काठमाडौं, चैत ३० । काठमाडौं उपत्यकासहित देशका विभिन्न भागमा पछिल्लो समय जंगलमा आगलागीका घटना बढ्दै गएपछि वायु प्रदूषण बढेको छ ।
वन तथा वातावरण विभागका अनुसार काठमाडौं उपत्यकामा प्रदूषित हावा जम्मा भएको छ । पश्चिमी क्षेत्रबाट आउने प्रदूषित हावाले उपत्यकाको वातावरण प्रभावित भएको छ ।
विभागका महानिर्देशक शिबलाल तिवारीले आज एक विज्ञप्ति जारी गर्दै बारा, पर्सा, चितवनलगायत १४० स्थानका वनमा लागेको डढेलोले उपत्यका र देशको मध्य तथा पूर्वी क्षेत्रमा वायु प्रदुषण अत्यधिक मात्रामा बढेको बताए । बिहान र बेलुका यो बढी तीव्र हुन्छ।
विभागले मुख्यतया बालबालिका, ज्येष्ठ नागरिक, श्वासप्रश्वासमा समस्या भएका र मुटुसम्बन्धी रोग भएका व्यक्तिहरूलाई सकेसम्म घरभित्रै बस्न र मास्क, चस्मा लगाएर बाहिर निस्कन अत्यावश्यक परेमा सुरक्षाका सबै उपाय अपनाउन आग्रह गरेको छ।
मौसमविद्का अनुसार ललितपुरको बुटवल, पाटन, भक्तपुरको भक्तपुर र मध्यपुरथिमि, काठमाडौंको रत्नपार्क, कीर्तिपुर र हेटौंडामा हावापानीको खतरा रहेको छ ।
वायु गुणस्तर सूचकाङ्कले माथि उल्लेखित क्षेत्रमा वायुको गुणस्तरले खतराको रेखा नाघेको देखाएको छ । शून्यदेखि ५० एक्युआइ मानव स्वास्थ्यका लागि ठिक मानिए पनि बुटवलमा २९२, पाटनमा २३२, भक्तपुरमा २२२, कीर्तिपुरमा १९१, मध्यपुर थिमिमा १८७, रत्नपार्कमा १८६ र हेटौंडामा १७४ मापन गरिएको छ ।
१००-२०० मापन गर्दा हानिकारक हुन्छ र यस्तो अवस्थामा वृद्ध र बालबालिकालाई खोकी लाग्ने र सास फेर्न समस्या हुने सम्भावना हुन्छ।
विभागले वनमा लागेको आगो निभाउन र आगामी दिनमा यसको रोकथामका लागि सक्दो सहयोग गर्न सबैलाई आग्रह गरेको छ ।
Published Date: 13 April 2023
