काठमाडौं, चैत ३० । नेपाल बार एशोसिएसन र सर्वोच्च अदालत बार एसोसिएसनका पदाधिकारीले तत्काल प्रधानन्यायाधीश नियुक्तिको प्रक्रिया थाल्न प्रधानमन्त्री पुष्पकमल दाहालको ध्यानाकर्षण गराएका छन् ।
बिहीबार बिहान प्रधानमन्त्री दाहालसँगको भेटपछि उनीहरुले प्रधानन्यायाधीश नियुक्तिको प्रक्रिया सुरु गर्न ध्यानाकर्षण गरेका हुन् । बुधबार पत्रकार सम्मेलन गर्दै एशोसिएसनले आगामी १० दिनभित्र प्रधानन्यायाधीश नियुक्त नभए आन्दोलन गर्ने घोषणा गरेको हो ।
प्रधानमन्त्रीसँगको भेटपछि सञ्चारकर्मीसँग कुरा गर्दै एनबीए अध्यक्ष गोपालकृष्ण घिमिरेले प्रधानमन्त्री संवैधानिक परिषद्को अध्यक्षसमेत भएकाले तत्काल प्रधानन्यायाधीश नियुक्ति गर्न पहल गर्न एनबिएले ध्यानाकर्षण गरेको बताए ।
प्रधानन्यायाधीश नियुक्तिका लागि प्रधानमन्त्री दाहालले पहल गरिरहेको र छिट्टै ठोस निष्कर्षमा पुग्ने बताउनुभएको पनि घिमिरेले बताए । प्रधानन्यायाधीशको नियुक्ति नहुँदा न्यायपालिकाको विश्वसनीयता खस्किएको र करिब १४ महिनादेखि कायममुकायम प्रधानन्यायाधीशले सर्वोच्च अदालत सञ्चालन गरेकाले न्याय प्रशासनमा कठिनाइ भइरहेको उनले बताए ।
