काठमाडौं, चैत २४ । करिब ८० हजार नेपाली विद्यार्थीले विदेश पढ्न नो अब्जेक्सन सर्टिफिकेट (एनओसी) लिएका छन् ।
शिक्षा, विज्ञान तथा प्रविधि मन्त्रालयको वैदेशिक अध्ययन अनुमति शाखाका प्रमुख वासुदेव वस्तीका अनुसार सन् २०२२ को जुलाईदेखि २०२३ मार्चसम्म ७९ हजार ३०९ जनाले विदेश अध्ययन स्वीकृति लिएका छन् ।
विदेशी अध्ययन अनुमति शाखाले अनलाइन आवेदन दिएको भोलिपल्टदेखि एनओसी दिन थालेको छ । बिहीबार ६०९ अनलाइन आवेदनमध्ये ५२९ आवेदन स्वीकृत भएका छन् । आवेदन स्वीकृत भएका ५०० आवेदकले शुक्रबार एनओसी पत्र पाउनेछन् ।
शाखाका अनुसार विभिन्न देशमा अध्ययनका लागि दैनिक औसत ६ सय जनाले विदेशी अध्ययन अनुमतिका लागि आवेदन दिने गरेका छन् । अब यसले सेवा प्रवाहलाई सहज र छिटो बनाउँदै लगेको वस्तीले बताए ।
सम्बन्धित विद्यार्थीलाई अनलाइन आवेदन दिने र एनओसी लिने समयबारे जानकारी गराउन थालेपछि लाइनमा बस्नेको संख्या घटेको शाखाले जनाएको छ ।
एनओसी लिन आउने विद्यार्थीलाई सहज सेवा दिन आफूले सक्दो प्रयास गरिरहेको वस्तीले बताए । उनले भने, ‘ग्राहकको सुविधाका लागि नि:शुल्क वाईफाई सेवा उपलब्ध गराइनेछ ।
‘विद्यार्थीलाई सहज बनाउने प्रयासमा छौं । हाम्रा साथीहरुको मिहिनेतले अब सोही दिन निवेदन दिने र भोलिपल्ट एनओसी जारी गर्न सफल भएका छौँ । अब नि:शुल्क वाइफाइ सुविधा उपलब्ध गराएर यसलाई थप सहज बनाउने प्रयासमा छौं,’ उनले भने ।