काठमाडौं, चैत २२ । नेपाल राष्ट्र बैंकले कार्ड प्रयोगकर्ताको गुनासो सम्बोधन गर्न बैंक तथा वित्तीय संस्थालाई २४सै घण्टा हेल्पडेस्क सञ्चालन गर्न निर्देशन दिएको छ ।
डिजिटल भुक्तानी प्रणाली प्रवद्र्धन गर्ने लक्ष्य राख्दै राष्ट्र बैंकले एक सार्वजनिक सूचना जारी गर्दै उक्त व्यवस्था कार्यान्वयन गर्न बैंक तथा वित्तीय संस्थाहरुलाई निर्देशन दिएको हो । भुक्तानी सेवा प्रदायकहरूलाई आफ्ना ग्राहकहरूको गुनासो तुरुन्तै सम्बोधन गर्न प्रत्येक दिन कम्तीमा १६ घण्टा (बिहान ६ बजेदेखि राति १० बजेसम्म) आफ्नो नोडल सेवाहरू सञ्चालन गर्न पनि भनिएको छ।
सेवाग्राहीले डिजिटल कारोबार बन्द हुँदा हुने झन्झटको गुनासो बढ्दै गएको बेला राष्ट्र बैंकले यस्तो व्यवस्था गरेको हो । यसले बैंक तथा वित्तीय संस्था र भुक्तानी सेवा प्रदायकहरूलाई आफ्ना ग्राहकहरूको गुनासो लिन तोकिएका नोडल अफिसरहरूको विवरण सार्वजनिक गर्न आग्रह गरेको छ।
राष्ट्र बैंकले सर्वसाधारणलाई नगदरहित कारोबार प्रणालीको प्रयोग बढाउन पनि सुझाव दिएको छ । यसले डिजिटल कारोबारका लागि QR कोड, मोबाइल वालेट, मोबाइल बैंकिङ, इन्टरनेट बैंकिङ र विभिन्न प्रकारका कार्डहरूको प्रयोगलाई सहजीकरण गर्दै आएको छ।
