काठमाडौं, चैत १४ । चीनको व्यापार नाफा गत वर्ष (सन् २०२२) मा ३०% ले बढेर हालसम्मकै उच्च विन्दुमा पुगेको छ । रुसी समाचार एजेन्सी ‘स्पुत्निक’ को एक रिपोर्टका अनुसार गत वर्ष चीनको व्यापार नाफा हालसम्मकै उच्च ८ खर्ब ७७ अर्ब डलर पुगेको हो ।
चीन विश्वमा सबैभन्दा बढी व्यापार नाफा गर्ने देशहरुमा पहिलो स्थानमा रहेको छ । यता, बढी व्यापार नाफा गर्ने देशहरुको सूचीमा दोस्रो स्थानमा रहेको छ । एक वर्षको अवधिमा रुसले १.७ गुणाले वृद्धि गरी व्यापार नाफा ३ खर्ब ३३ अर्ब डलर पुर्याएको छ ।
यस्तै, साउदी अरब २ खर्ब २१ अर्ब डलरको व्यापार नाफासहित तेस्रो स्थानमा रहेको छ । जुन नाफा सन् २०१२ यताकै उच्च हो । सन् २०२२ मा सबैभन्दा धेरै व्यापार नाफा वृद्धि गर्ने देशमा क्यानडा देखिएको छ ।
यसले व्यापार नाफा ४.८ गुणाले वृद्धि गरेर ३.६५ अर्ब डलरबाट १७.४५ अर्ब डलर पुर्याएको रिपोर्टमा उल्लेख छ । यता, सन् २०२२ मा नाइजेरिया व्यापार घाटालाई नाफामा परिणत गर्न सफल एक मात्र मुलुकको रुपमा देखिएको छ ।
सन् २०२२ मा कुल २६ वटा महत्वपूर्ण अर्थतन्त्रहरुले समग्रमा २४ खर्ब डलर भन्दा बढी व्यापार नाफा गरेका छन् । अघिल्लो वर्ष अर्थात सन् २०२१ मा भने ३२ वटा देशहरुले समग्रमा २१ खर्ब डलर मात्र व्यापार नाफा गरेका थिए ।
यता, चीन र रुसबीचको व्यापार सन् २०२२ मा ३४.३% ले बढेर १ खर्ब ९० अर्ब डलर पुगेको छ । यी दुई देशबीचको राम्रो सम्बन्ध, उर्जा कारोबारमा वृद्धि र समानान्तर द्विपक्षीय व्यापार सम्बन्धका कारण कारोबार उच्च भएको हो । सन् २०२३ मा यी दुई देशबीचको व्यापारमा दोब्बर वृद्धि हुने अनुमान गरिएको छ ।
Published Date: 28 March 2023
