गण्डकी, चैत १४ । नेपाली काँग्रेस गण्डकी प्रदेश सभापति शुक्रराज शर्माले निर्वाचनका बेला जनतासँग गरेका वाचा बिर्सन नहुने बताएका छन्।
कांग्रेस गण्डकी प्रदेश समितिको सोमबार बसेको बैठकमा शर्माले जनताको विश्वास र समर्थनका कारण प्रदेश र संघीय संसदको निर्वाचनमा कांग्रेस पहिलो दल बनेको बताए ।
उनले भने, “हामीले जनतासँग गरेका वाचा र प्रतिबद्धतालाई कुनै पनि हालतमा बिर्सन हुँदैन, जनतासमक्ष संकल्प गरेका थियौं, अब विश्वासलाई व्यवहारमा उतार्ने बेला आएको छ । पार्टीका सबै जिम्मेवार सहकर्मीले काम गर्नुपर्छ ।
सो अवसरमा नेपाली काँग्रेसका केन्द्रीय सदस्य तथा गण्डकी प्रदेश संसदीय दलका नेता सुरेन्द्रराज पाण्डेले छिट्टै गण्डकी प्रदेश सरकारको नेतृत्व काङ्ग्रेसले लिने वातावरण बन्ने विश्वास व्यक्त गरे ।
कांग्रेस नेतृत्वको सरकारमा मन्त्रालयको संख्या नबढाइने बताउँदै उनले जनतालाई सन्तुष्ट पार्न पार्टीले काम गर्ने विश्वास व्यक्त गरे ।
कांग्रेस गण्डकी प्रदेशका प्रवक्ता माधवप्रसाद बाँस्तोलाले प्रदेश कमिटीले प्रदेशका ११ जिल्लाका पार्टी सचिव, कोषाध्यक्ष र सह–सचिवबीच अन्तरक्रिया र अभिमुखीकरण गर्ने निर्णय गरेको जानकारी दिए ।
उनले पार्टी सङ्गठन विस्तार गर्न ११ वटै जिल्लामा सदस्यता वितरण अभियान सञ्चालन गर्ने निर्णय गरेको पनि बताए ।
