काठमाडौं, चैत १३ । संकटग्रस्त बनेपछि नियामकले बन्द गरेको अमेरिकी सिलिकन भ्याली बैंकको सम्पूर्ण निक्षेप र ऋण दायित्वहरु फर्स्ट सिटिजन्स बैंकले खरिद गर्ने भएको छ । असफल भएपछि फेडरल डिपोजिट इन्सुरेन्स कर्पोरेसन (एफडीआइसी) को अधिनमा रहेको सिलिकन भ्यालीको सबै निक्षेप र ऋण सोमबार बिक्री भएको हो ।
सन् २००८ को वित्तीय संकटपछि असफल हुने सबैभन्दा ठूलो बैंक बनेको सिलिकन भ्याली बैंक मार्च १० मा बन्द भएको थियो । यसको पतनपछि अस्थिर बन्दै आएको विश्वभरको बजार अब भने केही शान्त हुने अनुमान गरिएको छ ।
स्टार्टअप केन्द्रित सिलिकन भ्याली बैंकको निक्षेप र ऋणका लागि खरिदकर्ता भेटिएपछि लगानीकर्ता केही संयमित हुने विश्लेषण गरिएको छ । पूर्व सिलिकन भ्याली बैंकका १७ वटा शाखा कार्यालयहरु अब सोमबारदेखि फर्स्ट सिटिजन्स बैंकको शाखाको रुपमा खुल्ने रोयटर्सले उल्लेख गरेको छ ।
फर्स्ट सिटिजन्ले १६.५ अर्ब डलरको छुटमा सिलिकन भ्यालीको करिब ७२ अर्ब डलर बराबरको सम्पति प्राप्ती गरेको छ । यता, सिलिकन भ्यालीको अससफलताले एफडीआइसीको ‘निक्षेप बिमा कोष’ मा भने करिब २० अर्ब डलरको लागत बढेको छ । यद्दपि, यो सम्झौताले विश्वभरको बजारलाई केही राहत भने दिएको छ ।