काठमाडौं, चैत १३ । नेपाली राष्ट्रिय क्रिकेट टोलीका पूर्व कप्तान सन्दीप लामिछानेमाथि बलात्कारको आरोप लागेका मुद्दामा आज सुनुवाइ हुँदैछ । कुनै पनि पक्षले स्थगित गर्ने निर्णय नगरे आज सुनुवाइ हुने सम्भावना छ ।
लामिछानेले आफूलाई होटलको कोठामा राखेर बलात्कार गरेको आरोपमा १७ वर्षीया युवतीले २०७९ भदौ २१ मा गौशाला प्रहरी चौकीमा उजुरी दिएकी थिइन् । लामिछानेले असोज २० गते प्रहरीसमक्ष आत्मसमर्पण गरेका थिए । उनले आफूमाथि लागेको आरोप अस्वीकार गर्दै आएका छन् ।
कात्तिक १८ गते काठमाडौं जिल्ला अदालतका न्यायाधीश माधवप्रसाद घिमिरेको एकल इजलासले लामिछानेलाई प्रारम्भिक अनुसन्धानका लागि कारागार चलान गर्न आदेश दिएको थियो । उक्त फैसलाविरुद्ध लामिछानेका वकिलले उच्च अदालत पाटनमा पुनरावेदन दिएका थिए ।
पुष २८ गते उच्च अदालत पाटनले उनलाई कारागार पठाउने काठमाडौं जिल्ला अदालतको फैसला उल्टाएको थियो । उच्च अदालतले सन्दीपलाई विभिन्न सर्तमा २० लाख रुपैयाँ धरौटीमा रिहा गर्न आदेश दिएको थियो । उनी पुष २९ गते सुन्धाराको केन्द्रीय कारागारबाट धरौटीमा रिहा भएका थिए ।
सर्वोच्च अदालतले फागुन १५ गते बलात्कारको आरोप लागेका क्रिकेटर सन्दीप लामिछानेलाई क्रिकेट खेल्न विदेश जान अनुमति दिएको थियो ।
Published Date: 27 March 2023
