काठमाडौँ, चैत १३ । ४४ मेगावाटको सुपर मादी जलविद्युत आयोजनाले शनिबारदेखि राष्ट्रिय प्रसारण लाइनमा १५ मेगावाट विद्युत आपूर्ति सुरु गरेको छ ।
आयोजना पोखराबाट २३ किलोमिटर उत्तर पूर्वमा पर्ने कास्की जिल्लाको माडी गाउँपालिकाको वडा नम्बर १ र २ मा अवस्थित छ । आयोजनाले व्यावसायिक उत्पादनमा सर्नुअघि आगामी १५ दिनसम्म नेपाल विद्युत प्राधिकरणलाई माथि उल्लेखित युनिट बिजुली निःशुल्क उपलब्ध गराउने आयोजनाले जनाएको छ ।
लेखनाथ नगरपालिकामा रहेको सबस्टेसनमा १३२ केभी प्रसारण लाइनमार्फत उत्पादन भइरहेको आयोजनाका अध्यक्ष पुष्पज्योति ढुंगानाले बताए ।
सुपर माडीले प्रतिवर्ष २४२.६५ मिलियन युनिट बिजुली उत्पादन गर्नेछ । प्राधिकरणसँग भएको विद्युत खरिद सम्झौताअनुसार हिउँदको चार महिनाका लागि प्रतियुनिट ८ रुपैयाँ ४० पैसाका दरले प्राधिकरणलाई उत्पादन बिक्री गर्ने भएको छ भने बाँकी आठ महिनाका लागि प्रतियुनिट ४ रुपैयाँ ८० रुपैयाँ दर निर्धारण गरिएको छ ।
‘पीपीए दरका आधारमा आयोजनाले उत्पादन बिक्री गरेर वार्षिक १ अर्ब ३० करोड आम्दानी गर्ने अपेक्षा गरिएको छ,’ ढुंगानाले भने ।
आयोजना निर्माणका लागि सुरुमा ७ अर्ब ४७ करोड रुपैयाँ लागत विनियोजन गरिएको भए पनि लागत आठ अर्ब ७० करोड पुग्ने अनुमान गरिएको छ । ढुंगानाले बाढी र रुस–युक्रेन युद्धका कारण निर्माण सामग्रीको मूल्यवृद्धिका कारण लागत बढेको बताए ।
उनका अनुसार बाढीका कारण निर्माणमा ढिलाइ हुँदा बैंकको कर्जाको ब्याजमा मात्रै ४७ करोड रुपैयाँ अतिरिक्त दायित्व थपिएको छ ।
