कास्की, चैत १० । नेकपा माओवादी केन्द्रबाट सरकारमा सहभागी दुई मन्त्रीले राजीनामा दिएका छन् । सरकारलाई दिएकाे समर्थन फिर्ता लिदै भाैतिक पूर्वाधार विकास तथा यातायात व्यवस्था मन्त्री हरिबशादुर चुमान र उधाेग, पर्यटन, वन तथा वातावरण मन्त्री रेशमबहादुर जुग्जालीले पदबाट शुक्रबार राजीनामा दिएका छन् ।
आज विहान ११ बजे बसेकाे गण्डकी प्रदेशसभा अन्तर्गत माओवादी संसदीय दलकाे वैठकले सरकारलाई दिएकाे समर्थन फिर्ता लिदै सरकारमा संलग्न दुई मन्त्रीले राजीनामा दिने निर्णय गरेकाे थियाे । संसदीय दलका नेता एंव भाैतिक मन्त्री चुमानले केन्द्रकाे निर्णय अनुसार सरकारबाट बाहिरीएकाे बताए ।
प्रधानमन्त्री एंव माओवादी केन्द्रका अध्यक्ष पुष्पकमल दाहालले नेता चुमानलाई सरकारबाट बाहिरीन विहीबार फाेनबाट निर्देशन दिएका थिए । गण्डकीमा माओवादी र राप्रपाकाे साथले एमालेकाे नेतृत्वमा सरकार बनेकाे थियाे । ६० सदस्यीय प्रदेशसभामा सरकार बनाउनकाे लागि ३१ सांसदकाे आवश्यक पर्दछ ।
दुई मन्त्रीकाे राजीनामासँगै मुख्यमन्त्री खगराज अधिकारी नेतृत्व सरकार अल्पमतमा परेकाे छ । अब खगराजलाई कि राजीनामा दिने कि त विश्वासकाे मत लिने दुई विकल्प रहनेछन् । प्रदेशसभामा काँग्रेसका २७ सांसद रहेका छन् । गण्डकीमा एमालेका २२, राप्रपाका २ र स्वतन्त्र एकसांसद रहेका छन् ।
