काठमाडौं, चैत १० । नेपाल आयल निगमले तरल पदार्थ ग्यास (एलपिजी) सिलिन्डरको सुरक्षा मापदण्डबारे डिलरसँग छलफल सुरु गरेको छ ।
पछिल्लो समय ग्यास सिलिण्डर पड्किएर मृत्यु हुनेको संख्या पनि बढ्दै गएपछि निगमले सुरक्षित प्रयोग प्रवर्द्धन गर्न पेट्रोलियम पदार्थको सुरक्षा र मापदण्डबारे छलफल सुरु गरेको छ ।
निगमले बिहीबार पेट्रोल पम्प सञ्चालकसँग अन्तरक्रिया कार्यक्रम गरेको थियो । नेपाल आयल निगमका उपनिर्देशक विनितमणि उपाध्यायले सुरक्षा र मापदण्डका विषयमा काठमाडौं उपत्यकाका पेट्रोल पम्प सञ्चालकसँग अन्तरक्रिया गरेको जानकारी दिए ।
अन्तरक्रियामा निगमका आपूर्ति विभागका निर्देशक वीरेन्द्र गोइत, नेपाल पेट्रोलियम डिलर्स राष्ट्रिय संघका अध्यक्ष लिलेन्द्र प्रधान र वाग्मती डिलर्स एसोसिएसनका अध्यक्ष अच्युत खड्काको सहभागिता रहेको उपाध्यायले बताए ।
आगामी दिनमा निगमले आफ्ना सबै डिपोमा यस्ता कार्यक्रम गर्ने योजना रहेको उपाध्यायले बताए । उपनिर्देशक उपाध्यायका अनुसार ग्यास सिलिन्डरको सुरक्षा मापदण्डका विषयमा पनि यस्तै अन्तरक्रिया तथा तालिम सञ्चालन गरिने छ ।
त्यस्तै, निगमले आफ्ना सामाजिक सञ्जाल तथा अन्य प्लेटफर्ममा एलपीजी सिलिन्डर सुरक्षा अभियान सञ्चालन गरिरहेको छ ।
