काठमाडौं, चैत १० । पुनर्निर्माणपछि पहिलो पटक रानीपोखरी सर्वसाधारणका लागि खुल्ला गरिएको छ । महानगरीय प्रहरीबाट सरसफाई गरी बुधबारदेखि रानीपोखरी सर्वसाधारणका लागि खुला गरिएको काठमाडौं महानगरपालिकाका प्रवक्ता नवीन मानन्धरले जानकारी दिए ।
मानन्धरका अनुसार अब सर्वसाधारणले बिना टिकट रानीपोखरी जान पाउनेछन् । पुनर्निर्माणपछि महानगरले सर्वसाधारणका लागि खुला गर्न पटक–पटक पहल गरेको थियो । ‘बुधवार औपचारिक रुपमा उद्घाटन भए पनि आजदेखि मानिसहरु रानीपोखरी जान थालेका छन्’, प्रवक्ता मानन्धरले भने ।
२०१५ को महाभूकम्पमा क्षति पुगेपछि रानीपोखरीको पुनर्निर्माण गरी मौलिक रूप दिइएको थियो । तत्कालीन राष्ट्रिय पुनर्निर्माण प्राधिकरणले २०२१ डिसेम्बर २८ मा रानीपोखरी महानगरलाई हस्तान्तरण गरे पनि सर्वसाधारणका लागि खुला गरिएको थिएन ।
लामो समयदेखि बन्द र मर्मतसम्भार नहुँदा रानीपोखरी झारपातका कारण कुरुप बन्दै गएको छ । अब रानीपोखरी सरसफाई गरी सर्वसाधारणका लागि खुला गरिएको काठमाडौं महानगरपालिकाले जनाएको छ ।
Published Date: 24 March 2023
