मोरङ, चैत ५ । प्रदेशको नाम परिवर्तन गरी पहिचानका आधारमा नाम राख्न माग गर्दै निषेधित क्षेत्र उल्लंघन गरी मुख्यमन्त्रीको कार्यालय नजिकै प्रदर्शन गर्ने चार जनालाई प्रहरीले पक्राउ गरेको छ ।
संयुक्त संघर्ष समितिले निषेधित क्षेत्र उल्लंघन गरी कोशी प्रदेशको नाम परिवर्तन गर्न माग गर्दै प्रदर्शन गरेपछि उनीहरु पक्राउ परेका हुन् ।
भीडलाई तितरबितर पार्न प्रहरीले एक दर्जन अश्रुग्यास र तीन राउण्ड हवाई फायर गरेको थियो । अर्कोतिर आन्दोलनकारीको अर्को टोलीले प्रदेश सभा अगाडि प्रदर्शन गरिरहेको छ ।
प्रदेशसभाले फागुन १७ गते प्रदेशको नाम कोशी राखेको थियो, त्यसयता पहिचानका आधारमा प्रदेशको नामाकरण गर्नुपर्ने माग गर्दै विभिन्न समूहले निरन्तर विरोध गर्दै आएका छन् ।
प्रदर्शनपछि आइतबार बस्ने बैठकलाई नेता गोपाल किराती, कुमार लिङ्देन, सञ्जुहाङ पालुङवा, प्रेम एकटेनलगायतले सम्बोधन गर्ने कार्यक्रम छ ।
प्रदेश नामाकरणको विरोधमा असन्तुष्ट दलले आन्दोलन घोषणा गरेपछि जिल्ला प्रशासन कार्यालय मोरङले विराटनगरका पाँच स्थानमा निषेधाज्ञा जारी गरेको थियो ।
