काठमाडौं, चैत ३ । अर्थ मन्त्रालय र काठमाडौंस्थित बेलायती दूतावासबीच स्थानीय पूर्वाधार सहयोग कार्यक्रम मार्फत बेलायत–नेपाल सहकार्यका लागि बिहीबार एक समझदारीपत्रमा हस्ताक्षर भएको छ ।
मन्त्रालयमा आयोजित कार्यक्रममा अर्थसचिव तोयाम राय र नेपालका लागि बेलायती राजदूत निकोला पोलिटले आ–आफ्नो देशका तर्फबाट सम्झौतामा हस्ताक्षर गरे ।
स्थानीय पूर्वाधार सहयोग कार्यक्रम नेपाल सरकार र बेलायती दूतावास काठमाडौको बीचमा संयुक्त रुपमा डिजाइन गरिएको हो । यसको फलस्वरूप १७ लाख नेपाली नागरिकले प्रत्यक्ष रूपमा थप दिगो र समावेशी पूर्वाधार सेवा प्राप्त गर्नेछन् ।
यस कार्यका लागि बेलायतले ९० मिलियन पाउण्ड (१४ अर्ब ४० करोड रुपैयाँ) सहयोग उपलब्ध गराउने अर्थ मन्त्रालयले जारी गरेको विज्ञप्तिमा उल्लेख छ ।
महत्त्वपूर्ण रूपमा, कार्यक्रमले आगामी छ वर्षहरूमा २ अर्ब पाउण्ड (रु. ३२० अर्ब) भन्दा बढीको स्थानीय पूर्वाधारमा व्यापक लगानीको वितरण र दिगोपन सुधार गर्न नेपाल सरकारलाई सहयोग गर्नेछ।
Published Date: 17 March 2023
