काठमाडौं, चैत ३ । नयाँ उपराष्ट्रपति चयनका लागि संघीय संसद भवन नयाँ बानेश्वरमा मतदान सुरु भएको छ । बिहान १० बजेबाट सुरु भएको मतदान दिउँसो ३ बजेसम्म चल्नेछ ।
संघीय संसदका उपराष्ट्रपतिका उम्मेदवार रामसहायाप्रसाद यादव र प्रदेशसभाका राजेन्द्रसिंह रावलले पहिलो मतदान गरेका छन् । संघीय संसद र प्रदेशसभा सदस्यका लागि छुट्टाछुट्टै मतदान केन्द्र तोकिएको छ ।
उपराष्ट्रपतिमा नेकपा (एमाले)का अष्टलक्ष्मी शाक्य (बोहरा), जनता पार्टीकी ममता झा र जनता समाजवादी पार्टीका रामसहायाप्रसाद यादव उम्मेदवार छन् । निर्वाचनमा संघीय संसदका ३ सय ३२ र प्रदेशसभाका ५ सय ५० मतदाता छन् ।
बिहान ९ बजेदेखि नै मतदाताहरु मतदान केन्द्रमा लाइन लागेका छन् भने उम्मेदवारहरु मतदान केन्द्रमा पुगिसकेका छन् ।
मतदान सकिए लगत्तै मतगणना सुरु हुने निर्वाचन अधिकृतको कार्यालयले जनाएको छ ।
Published Date: 17 March 2023
