काठमाडौं, फागुन २३ । नेपाल भ्रमणमा आएका भारतीय नौसेनाका अधिकृतलाई त्रिभुवन अन्तर्राष्ट्रिय विमानस्थलबाट बन्दुकसहित पक्राउ गरिएको छ ।
भारतीय नौसेनाका चन्द्रशेखर सिंह सोमबार स्वदेश फर्कने क्रममा लगेजमा भरुवा बन्दुक फेला परेपछि टिआइएबाट पक्राउ परेका हुन् ।
सिंहलाई महानगरीय प्रहरी वृत्त गौशालामा राखिएको उच्च प्रहरी स्रोतले जनाएको छ । ‘टिआइएको प्रस्थान हलको झोला कोठामा पुगेपछि उनको लगेजमा बन्दुक भेटिएपछि उनलाई पक्राउ गरिएको हो । श्रोतका अनुसार उनलाई पक्राउ गरेलगत्तै भारतीय दूतावासलाई जानकारी गराइएको थियो ।
उनी एयर इन्डिगोको विमानमा भारत जान लागेका थिए । त्यसबेला टिआइएमा नियमित चेकजाँचका क्रममा सुरक्षाकर्मीले बन्दुक फेला पारेका थिए । उनले यसअघि बन्दुक ल्याएको हो वा होइन भन्नेबारे प्रहरीले केही भन्न चाहेन ।
