काठमाडौं, फागुन २३ । शान्ति सम्झौताविपरीत हुने कुनै पनि गतिविधिको विरोध र प्रतिकारलगायत तीनबुँदे निर्णय गर्दै माओवादी नेताहरुको बैठक सकिएको छ ।
बैठकपछि जारी विज्ञप्तिमा भनिएको छ, ‘संक्रमणकालीन न्यायसम्बन्धी चलिरहेको छलफलप्रति हाम्रो गम्भीर ध्यानाकर्षण भएको छ । शान्ति प्रक्रियासँग सम्बन्धित विषयहरू बृहत् शान्ति सम्झौताबमोजिम व्यवस्थित हुनुपर्नेमा हामी दृढ विश्वास गर्छौं ।”
बैठकका निर्णयहरूमा विस्तृत शान्ति सम्झौताको मर्मविपरीत हुने कुनै पनि गतिविधिको विरोध र प्रतिवाद गर्ने र संक्रमणकालीन न्यायसम्बन्धी सबै विषयलाई सत्य निरुपण तथा मेलमिलाप आयोग र बेपत्ता पारिएका व्यक्तिको छानबिन आयोगमार्फत टुङ्गो लगाउने र छिटो कार्यान्वयन गर्नेतर्फ केन्द्रित रहेको छ । बैठकले राज्यसँग विभिन्न समयमा भएका सम्झौता कार्यान्वयन गर्न पार्टीका सदस्य प्रतिबद्ध रहेको बताएको छ ।
