काठमाडौं, फागुन २१ । नेपाल एयरलाइन्सले सिधै दक्षिण कोरिया उडान गर्ने भएको छ ।
निगमका प्रवक्ता अर्चना खड्काले दक्षिण कोरियाको राजधानी सियोलस्थित इन्चोन अन्तर्राष्ट्रिय विमानस्थलमा उडान भर्ने प्रक्रिया अगाडि बढाइएको बताइन् ।
यसका लागि उपमहाप्रबन्धक (प्राविधिक) इन्जिनियर विक्रम केसीको संयोजकत्वमा १० सदस्यीय सुरक्षा लेखापरीक्षण उपसमिति गठन गरिएको छ । समितिमा निगमका सुरक्षा, इन्जिनियरिङलगायत विभागको प्रतिनिधित्व रहेको छ ।
दक्षिण कोरियामा हुने सिधा उडानको सेफ्टी अडिट गर्न समिति गठन गरिएको छ । ‘उडानका लागि दक्षिण कोरियाको भूमि, पूर्वाधार तथा यातायात मन्त्रालय (मोलिट) मातहतको नागरिक उड्डयन प्राधिकरणले लेखापरीक्षण गर्नुपर्ने भएको छ, त्यसको तयारीका लागि निगमको तर्फबाट समिति गठन गरी काम सुरु गर्न लागेको हो । काम गर्छु,’ खड्काले भने ।
निगमले अन्तर्राष्ट्रिय उडान गन्तव्य विस्तार गर्ने योजनाअनुसार दक्षिण कोरियामा सिधा उडान गर्ने तयारी थालेको छ । राष्ट्रिय ध्वजावाहकको उपस्थिति र सिधा उडान सुरु भएपछि बजार नियन्त्रण हुने र हवाई टिकटको मूल्य घट्ने र राष्ट्रिय ध्वजावाहकको दायित्व पनि पूरा हुने निगमको विश्वास छ ।
निगमले हाल भारतका तीन गन्तव्य र आठ देशका १० गन्तव्यमा अन्तर्राष्ट्रिय उडान गरिरहेको छ ।
