काठमाडौं, फागुन २१ । सञ्चार तथा सूचना प्रविधिमन्त्री रेखा शर्माले काठमाडौं उपत्यकालगायत प्रमुख सहरका अव्यवस्थित ओभरहेड केबलको व्यवस्थित व्यवस्थापन गर्न नेपाल दूरसञ्चार प्राधिकरणलाई निर्देशन दिएकी छन् ।
प्राधिकरणको २५औँ वार्षिकोत्सवका अवसरमा शनिबार राजधानीमा आयोजित कार्यक्रमलाई सम्बोधन गर्दै मन्त्री शर्माले सडक सफा राख्न र सहरलाई व्यवस्थित गर्न ओभरहेड केबलको व्यवस्थापन गर्नुपर्ने बताईन् ।
सञ्चार मन्त्रालयले प्राधिकरणका लागि आवश्यक ऐन–नियम निर्माण गर्ने काम गरिरहेको जानकारी दिँदै तत्काल नतिजा दिन सरोकारवाला सबैलाई एकजुट हुन आग्रह गरिन् ।
सो अवसरमा मन्त्रालयका सहसचिव नेत्रप्रसाद सुवेदीले प्राधिकरणलाई सेवा विस्तार र गुणस्तर अभिवृद्धि गर्न आग्रह गरे।
कार्यक्रममा बोल्दै प्राधिकरणका अध्यक्ष पुरुषोत्तम खनालले अव्यवस्थित ओभरहेड केबल व्यवस्थापनका लागि अहिले भूमिगत अप्टिकल फाइबर बिछ्याउने काम भइरहेको जानकारी दिए ।
