कर्णाली, फागुन १८ । राष्ट्रिय प्रजातन्त्र पार्टी (राप्रपा) ले मुख्यमन्त्री राजकुमार शर्मा नेतृत्वको कर्णाली प्रदेश सरकारलाई दिएको समर्थन फिर्ता लिएको छ ।
राप्रपा प्रदेशसभा सदस्य सन्तोषी शाहीले आज प्रदेश प्रमुख तिलक परियारलाई लिखित पत्र बुझाएर पार्टीले प्रदेश सरकारलाई दिएको समर्थन फिर्ता लिएको जानकारी दिएकी हुन् ।
राप्रपाको केन्द्रीय नेतृत्वको निर्देशनअनुसार कर्णाली प्रदेश सरकारबाट पार्टी बाहिरिएको उनले बताईन् । राप्रपाले यसअघि पनि संघीय सरकारलाई दिएको समर्थन फिर्ता लिएको थियो ।
“परिवर्तित राजनीतिक परिप्रेक्ष्यमा राप्रपा सत्तामा बस्नु उपयुक्त नहुने पार्टीको केन्द्रीय नेतृत्वले निर्णय गरेको छ, यो निर्णयसँगै राप्रपाले देशभरका प्रदेश सरकारहरूलाई दिएको समर्थन फिर्ता लिनेछ,” शाहीले भनिन्।
४० सदस्यीय कर्णाली प्रदेशसभामा राप्रपाको एउटा मात्र सिट छ ।
Published Date: 02 March 2023
