काठमाडौं, फागुन १७ । प्रदेश नं १ को नाम ‘कोशी’ राख्न प्रदेश सभाको बहुमत सदस्यले छलफलका लागि अनुमोदन गरेका छन् । यस्तै प्रदेशको नाम ‘किराँत–लिम्बुवान–सगरमाथा’ राख्ने प्रस्ताव प्रदेशसभामा छलफलपछि अस्वीकृत भएको छ ।
प्रदेशको नाम कोशी राख्ने विषयमा छलफल गर्न एमालेका प्रदेशसभा सदस्य रामबहादुर राना मगरको प्रस्ताव प्रदेशसभाले स्वीकृत गरेको छ । अहिले प्रदेशसभामा प्रदेशको नाम कोशीबारे छलफल भइरहेको छ । छलफलपछि संसदमा प्रस्तावमाथि मतदान हुने बताइएको छ ।
एमाले प्रदेशसभा सदस्य रामराना मगरले प्रदेश १ को नाम ‘कोशी’ राख्न प्रस्ताव दर्ता गराएका छन् । प्रस्तावको पक्षमा नेपाली कांग्रेसका भूमिप्रसाद राजवंशी रहेका छन् ।
प्रदेशसभाको बहुमतले प्रदेशको नाम ‘कोशी’ छलफलका लागि स्वीकृत गरेपछि सभामुख बाबुराम गौतमले प्रदेशको नाम किराँत–लिम्बुवान–सगरमाथा राख्ने प्रस्ताव अस्वीकृत भएको बताए ।
यसअघि नेकपा (एकीकृत समाजवादी) र जनता समाजवादी पार्टी (जसपा)का तर्फबाट प्रदेशसभा सदस्य राजेन्द्र राई सचिवालयले प्रदेशको नाम ‘किरात–लिम्बुवान–सगरमाथा’ राख्न प्रस्ताव गरेका थिए ।
