विराटनगर, फागुन १७ । नेकपा (एकीकृत समाजवादी) ले नेकपा एमाले र नेपाली काँग्रेसले आफ्नो विगतको अडान त्यागेर प्रदेश १ को नाम ‘कोशी’ राख्ने प्रस्ताव गरेको दाबी गरेको छ ।
प्रदेश १ को प्रदेशसभाको बुधबारको बैठकमा प्रदेशको नाम किरात–लिम्बुवान–सगरमाथा राख्ने प्रस्ताव राख्दै एकीकृत समाजवादीका नेता राजेन्द्रकुमार राईले एमाले र काँग्रेसले विगतको प्रतिबद्धता बिर्सेको आरोप लगाए ।
उनले संविधानसभाको दुवै निर्वाचनमा एमालेले आफ्नो चुनावी वाचामा पहिचानसहितको प्रदेशको मुद्दा उठाएको बताए । पहिलो संविधानसभामा एमालेले पहिचान र भूगोलका आधारमा नामकरण गरेर १३ प्रदेशसम्म बनाउन सकिने प्रस्ताव गरेको दाबी गर्दै राईले पहिचानको विषयलाई बेवास्ता गरेर नाम प्रस्ताव गर्नु उपयुक्त नभएको बताए ।
नेपाली कांग्रेसले विगतमा प्रदेशको नामकरण गर्दा पनि पहिचानलाई आधार मानेको भए पनि अहिले आफ्नो प्रतिबद्धताबाट पछि हटेको उनको आरोप छ । ‘द्वन्द्व मेटाउने र पहिचान खोज्ने नाम हुनुपर्छ,’ उनले भने ।
उनले विगतमा कांग्रेसले जस्तै समस्यालाई पनि सम्बोधन गर्ने उनको भनाइ छ । नेकपा एकीकृत समाजवादी पार्टीको बैठक बस्दैछ ।
