काठमाडौं, फागुन १२ । निर्वाचनपूर्व सत्तारुढ गठबन्धनका चार दलबीच आज साँझ ५ बजे पुनः बैठक बस्दैछ । राष्ट्रपतिको उम्मेदवार टुंगो लगाउने कार्यसूची रहेको छ ।
शुक्रबार बिहान प्रधानमन्त्रीको सरकारी निवास बालुवाटारमा नेपाली काँग्रेस, नेकपा (माओवादी केन्द्र), नेकपा (एकीकृत समाजवादी) र जनता समाजवादी पार्टी (जसपा)का शीर्ष नेताहरुको बैठक एउटै एजेण्डामा तीन घण्टासम्म चलेको थियो ।
बैठकमा राष्ट्रपतिको निर्वाचनका विषयमा छलफल भएको बैठकमा सहभागी नेपाली काँग्रेसका महासचिव गगन थापाले जानकारी दिए । महासचिव थापाले पनि दलहरुबीचको छलफल सकारात्मक भएको बताए ।
थापाले भने, ‘आज फेरि साँझ ५ बजे बैठक बस्नेछ । त्यही बैठकले राष्ट्रपतिको उम्मेदवार तय गर्नेछ।
साँझको बैठकअघि चार दलका शीर्ष नेताहरुले आ–आफ्नो पार्टीभित्र आन्तरिक छलफल गर्ने बैठकमा सहभागी नेताहरुले बताएका छन् ।
