काठमाडौं, फागुन ११ । अबदेखि काठमाडौं उपत्यकाका प्रमुख सडकखण्डमा सवारी चलाउने मोटरसाइकल चालकले ५० किलोमिटर प्रतिघण्टाभन्दा बढीको गतिमा सवारी चलाउन पाउने छैनन् ।
काठमाडौं उपत्यका ट्राफिक प्रहरी कार्यालयले आजबाट उपत्यकाका प्रमुख सडक खण्डमा यो नियम लागू गरेको छ । केभीटीपीओका अनुसार कलंकी–कोटेश्वर र कोटेश्वर–भक्तपुर खण्डमा अधिकतम गतिको सीमा ५० किलोमिटर प्रतिघण्टा तोकिएको छ । यी सडकको सर्भिस ट्र्याकमा चल्ने सवारी साधनका लागि प्रतिघण्टा २० किलोमिटरको सीमा तोकिएको छ ।
केभीटीपीओले तीव्र गतिका कारण हुने सडक दुर्घटनालाई नियन्त्रण गर्ने उद्देश्यले सवारीसाधनको गति नियन्त्रण गरेको जनाएको छ । नियम उल्लङ्घन गरेको पाइएमा नगद जरिवाना हुनेछ ।