काठमाडौं, फागुन ११ । सन्दीप लामिछानेले युएईमा हुने आईसीसी विश्वकप लिग दुईका खेल खेल्न नपाउने भएका छन् । नेपाल क्रिकेट संघ (क्यान)ले युएई जाने खेलाडीको सुचीमा लामिछानेको स्थानमा प्रतिश जीसीलाई राखेको छ ।
स्रोतका अनुसार कानुनी अवरोधका कारण क्यानले विदेशमा हुने सिरिजमा लामिछानेलाई समावेश गरेको छैन ।
नेपालले लिग २ अन्तर्गत फेब्रुअरी २७ देखि मार्च ६ सम्म युएई र पपुवा न्युगिनीसँग खेल्दैछ । नेपाली टोलीले आफ्नो पहिलो खेल फेब्रुअरी २७ मा पपुवा न्युगिनीसँग खेल्नेछ भने फेब्रुअरी २५ मा युएई जानेछ ।
बालिका बलात्कारको आरोपमा पक्राउ परेका सन्दीप लामिछानेविरुद्ध जिल्ला अदालत काठमाडौंमा मुद्दा विचाराधीन छ । उच्च अदालत पाटनले २० लाख धरौटीमा रिहा गरेपछि क्यानले घरमै स्कटल्याण्ड र नामिबियाविरुद्धको खेलका लागि टोलीमा समावेश गरेको थियो ।
उच्च अदालतले लामिछानेलाई धरौटीमा रिहा गर्ने आदेश दिँदै विदेश जान नदिने उल्लेख गरेको थियो ।
