भक्तपुर, चैत ३० । देशमा बढ्दो इन्धन संकट र मूल्यवृद्धिका बीच साइकल कनेक्ट भक्तपुरको आयोजना तथा नेपाल इको प्यानल, जुजु बाइक्स र जेरो वन स्टुडियो को सहकार्यमा एमटिबी अण्डर–२० उकालो साइकल प्रतियोगिता भक्तपुरमा सम्पन्न भएको छ।
प्रतियोगिताको उद्देश्य विशेषगरी जेनजी युवालाई वातावरणमैत्री जीवनशैलीतर्फ प्रेरित गर्दै शारीरिक तथा मानसिक स्वास्थ्य सुदृढ बनाउनुका साथै साइकलमार्फत भविष्यमा देश–विदेशमा पहिचान स्थापित गराउनु रहेको रियाज कर्माचार्य ले जानकारी दिए।
भक्तपुरको सूर्यविनायक चोकदेखि घ्याम्पे डाँडासम्मको करिब ५ किलोमिटर उकालो मार्गमा सम्पन्न प्रतियोगितामा आयुष मगर ले २८ मिनेटमा दूरी पार गर्दै प्रथम स्थान हासिल गर्न सफल भए।
प्रतियोगितामा सहभागीहरूले यस्ता कार्यक्रमले युवामा साइकलिङमार्फत पनि सम्भावना खोज्न सकिने आत्मविश्वास बढाएको बताए। साथै, इन्धन संकटको अवस्थामा साइकललाई वैकल्पिक सवारीका रूपमा प्रोत्साहन गर्न यस्ता गतिविधिले सकारात्मक टेवा पुग्ने अपेक्षा गरिएको छ।
