काठमाडौँ, माघ २८ । केवल क्यूएफएक्स (QFX) मा प्रदर्शन भएका चलचित्र मात्र सफल हुन्छन् भन्ने प्रचलित भ्रम हाल प्रदर्शनरत चलचित्र ‘आँ बाट आमा’ ले तोडिदिएको छ। चलचित्रले देशभरका सयौँ स्वतन्त्र चलचित्रघरहरूमा दर्शकको उल्लेखनीय उपस्थितिसहित उत्कृष्ट व्यापार गरिरहेको छ। हालसम्म चलचित्रले करिब ६ करोड रुपैयाँको कारोबार पूरा गरिसकेको छ।
यो उपलब्धि केवल एउटा चलचित्रको व्यावसायिक सफलतामा सीमित छैन, बरु नेपाली चलचित्र वितरण प्रणालीमा विद्यमान एकाधिकार प्रवृत्तिलाई चुनौती दिने महत्वपूर्ण उदाहरणका रूपमा समेत हेरिएको छ। ‘आँ बाट आमा’ ले ठूला मल्टिप्लेक्सहरूबाहिरका स्वतन्त्र चलचित्रघरहरू पनि दर्शक आकर्षित गर्न सक्षम छन् भन्ने तथ्य प्रमाणित गरेको छ।
दर्शकहरूले स्वतन्त्र चलचित्रघरहरूमा पुगेर चलचित्रलाई दिएको साथले ती चलचित्रघरहरूको अस्तित्व र महत्वलाई थप बलियो बनाएको छ। चलचित्रकर्मीहरूको भनाइमा यही अभ्यास निरन्तर रहन सके नेपाली चलचित्र उद्योग अझ सन्तुलित, समावेशी र आत्मनिर्भर बन्दै जानेछ।
अब दर्शकहरूले ‘आँ बाट आमा’ जस्तै अन्य नेपाली चलचित्रलाई पनि स्वतन्त्र चलचित्रघरहरूमा हेरेर साथ दिनुपर्ने आवश्यकता औँल्याइएको छ।