काठमाडौं, माघ २० । भक्तपुर क्षेत्र नम्बर २ मा आगामी २१ फागुनमा हुने प्रतिनिधिसभा निर्वाचनमा पुराना र नयाँ उम्मेदवारबीच रोचक प्रतिस्पर्धा देखिएको छ । यस क्षेत्रबाट विगतमा नेमकिपा, कांग्रेस र एमालेले आलोपालो जित्दै आएका छन् ।
२०४८ मा कांग्रेसका जगन्नाथ आचार्य, २०५१ मा नेमकिपाका आशाकाजी बसुकला, २०५६ मा कांग्रेसका लेखनाथ न्यौपाने, २०६४ मा नेमकिपाका सुनिल प्रजापति, २०७० मा कांग्रेसका रामेश्वरप्रसाद ढुंगेल, २०७४ मा एमालेका महेश बस्नेत र २०७९ मा कांग्रेसका दुर्लभ थापा विजयी भएका थिए ।
यसपटक ३२ जना उम्मेदवार चुनावी प्रतिस्पर्धामा छन् । प्रमुख उम्मेदवारमा एमाले सचिव महेश बस्नेत, कांग्रेसका कविर राणा, माओवादीका रामप्रसाद सापकोटा, रास्वपाका राजीव खत्री, नेमकिपाका रमेश वैद्य, राप्रपाका विक्रम थापा र उज्यालो नेपाल पार्टीका जितराम लामा छन् ।
उम्मेदवारहरूले विकास, रोजगारी, शिक्षा, स्वास्थ्य, सुशासन र पर्यटनलाई मुख्य एजेन्डा बनाएका छन् ।
यस क्षेत्रमा कुल ९८ हजार ३५६ मतदाता छन् । ३९ मतदान स्थल र ११४ मतदान केन्द्र तोकिएका छन् । मध्यपुर थिमी नगरपालिकाका ९ र सूर्यविनायक नगरपालिकाका १० वडा यस क्षेत्रमा पर्छन् ।
Published Date: 03 February 2026
