काठमाडौं, पुस १६ । नेपाल–चीन व्यापार र आवागमनका लागि महत्वपूर्ण मानिने केरुङ–रसुवागढी सीमा नाका जोड्ने बेली ब्रिज छिट्टै सञ्चालनमा आउने भएको छ । चिनियाँ दूतावासले सार्वजनिक गरेको जानकारीअनुसार लामो समयदेखि प्रतीक्षामा रहेको उक्त बेली ब्रिज अब चाँडै नै प्रयोगमा आउने तयारी अन्तिम चरणमा पुगेको हो ।
बाढीका कारण रसुवागढी क्षेत्रमा रहेको मितेरी पुल क्षतिग्रस्त भएपछि नेपाल–चीन सीधा स्थलमार्ग अवरुद्ध हुँदै आएको थियो । त्यसयता वैकल्पिक संरचनाको रूपमा बेली ब्रिज निर्माण कार्य अघि बढाइएको थियो । चिनियाँ पक्षको सहयोगमा निर्माण सम्पन्न भएको उक्त पुल सञ्चालनमा आएपछि सीमा नाकामा व्यापार, ढुवानी तथा आवतजावत सहज हुने अपेक्षा गरिएको छ ।
बेली ब्रिज सञ्चालनमा आएपछि आयात–निर्यात कारोबार पुनः लयमा फर्किने, उत्तरी नाकामार्फत हुने व्यापारिक गतिविधि बढ्ने तथा स्थानीय व्यवसायी र सर्वसाधारणलाई ठूलो राहत पुग्ने विश्वास गरिएको छ । साथै, नेपाल–चीनबीचको आर्थिक, व्यापारिक र कूटनीतिक सम्बन्ध थप सुदृढ हुने बताइएको छ ।
सरकारी निकाय तथा सरोकारवालाहरूका अनुसार पुल सञ्चालनको औपचारिक मिति चाँडै नै सार्वजनिक गरिनेछ । लामो समयदेखि बन्दप्रायः रहेको रसुवागढी नाका खुल्ने सुनिश्चिततासँगै व्यवसायीहरूमा उत्साह देखिएको छ ।
Published Date: 31 December 2025
