काठमाडौँ, मंसिर १६ । साताको तेस्रो कारोबार दिन मंगलबार पनि सेयरबजार परिसूचक नेप्से ओरालो लागेको छ । मंगलबार नेप्से ०.५३ को झिनो अंकले घटेर २ हजार ६४४.७० विन्दुमा कायम भएको हो । मंगलबार सेयरबजारमा ३२४ कंपनीका सेयर कारोबार भएकोमा ३८.५८ प्रतिशत कम्पनीका सेयरमूल्यमा सुधार आएको छ । यस्तै, ३६.७२ प्रतिशत कम्पनीका सेयरमूल्यमा गिरावट आएको छ भने चार प्रतिशत कम्पनीका सेयरमूल्य भने स्थिर रहेका छन् ।
मंगलबार सेयरबजारमा एक करोड ८ लाख १० हजार १०६ कित्ता सेयर ४ अर्ब ४८ करोड १३ लाख ९४ हजार रुपैयाँमा किनबेच भएको छ । कारोबार रकम सोमबारको तुलनामा २३ करोड ५० लाख रुपैयाँले कमी हो ।
सेयरबजारमा सूचीकृत समूहगत परिसूचकमध्ये विकास बैंक, वित्त, जलविद्युत, उत्पादनशील, म्युचल फण्ड, निर्जीवन बीमा, व्यापार तथा अन्य समूहका परिसूचक बढेका छन् । सबैभन्दा धेरै व्यापार समूहको परिसूचक ०.७५ प्रतिशतले बढेको छ ।
वाणिज्य बैंक, होटेल तथा पर्यटन, लगानी, जीवन बीमा तथा लघुवित्त समूहका परिसूचक भने ओरालो लागेका छन् । सागर डिष्टीलरी, स्वस्तिक लघुवित्त वित्तीय संस्था तथा झापा इनर्जीका सेयरधनीले सबैभन्दा बढी कमाएका छन् । सबैभन्दा बढी गुमाउनेमा भने ग्रीन भेन्चर्स लिमिटेड, स्टाण्डर्ड चार्टड बैंक तथा एनआईसी एसिया सेलेक्ट फण्डका लगानीकर्ता छन् ।
Published Date: 02 December 2025
