भक्तपुर, भदौ १३ । सामाजिक अभियन्ता आशिका तामाङलाई जिल्ला अदालत भक्तपुरले पाँच दिनको कैद सजाय तथा पाँच सय रुपैयाँ जरिवाना तिराउने फैसला सुनाए पनि उनी थुनामा बस्नु नपर्ने भएको छ । यद्यपि, तामाङसंगै प्रतिवादी बनाइएका शरण तिरुवाले भने पाँच दिनसम्म थुनामै बस्नु पर्ने भएको छ ।
जिल्ला अदालत भक्तपुरका न्यायाधीश विश्वनाथ भट्टराईको इजलासले बिहीवार साँझ तामाङलाई उक्त आदेश सुनाए पनि उनले प्रहरीको अनुसन्धानकै क्रममा पाँच दिन हिरासतमा बसिसकेकाले गर्दा अहिलेको आदेश अनुसार उनी थप कैदमा बस्नु नपर्ने भएको हो ।
भक्तपुर जिल्ला अदालत स्रोतले जनाए अनुसार तामाङले यो मुद्धामा २० हजार रुपैयाँ धरौटी जम्मा गरिसकेकाले उक्त पाँच सय रुपैयाँ तथा जाहेरवालालाई दामाशाहीले तिर्नु पर्ने आठ हजार रुपैयाँसमेत बुझाउनु नपर्ने भएको छ ।
यद्यपि, तामाङसंगै प्रतिवादी बनाइएका शरण तिरुवाले भने प्रहरी अनुसन्धानका क्रममा फरार भई सोझै अदालतमा उपस्थित भएकाले उनले भने पाँच दिनको कैद भुक्तान गर्नु पर्नेको छ । यद्यपि, उनले पनि २० हजार रुपैयाँ धरौटी रकम जम्मा गरेकाले उनले पाँच सय रुपैयाँ जरिवाना तथा जाहेरवालालाई तिर्नु पर्ने आठ हजार रुपैयाँ तिर्नु नपर्ने भएको छ ।
यसैबीच, बिहीवार तामाङको पक्षबाट वहस गर्ने कानून व्यवसायीनिकट स्रोतका अनुसार उनले अदालतमा वयान दिने क्रममा आफूबाट गल्ति भएको, आफूले आवेगमा आएर उक्त क्रियाकलाप गरेको तथा मनशाय नराखि उक्त कार्य भएको भन्दै अदालतसमक्ष क्षमा पाउँ भन्दै माफी मागेकाले पनि अदालतले पाँच दिनको मात्र कैद सजाय तोकेको हो ।
साँगास्थित सूर्य विनायक नगरपालिका–९ र १० जोड्ने झोलुङ्गे पुल तर्दा लाग्ने २० रुपैयाँ शुल्कको विरोध गर्दै रसिद बुक च्यातिदिएको घटनामा तामानविरुद्ध मुद्धा परेको थियो ।
उनीविरुद्ध प्रहरी वृत्त जगातीमार्फत ‘आपराधिक उपद्रव’ गरेको अभियोगमा मुद्दा दर्ता गरिएको थियो । भक्तपुर अदालतले तामाङ तथा तिरुवाले जाहेवारलाई जनही तथा दामासाहीले ८ हजार तीन सय रुपैयाँ जम्मा गर्नुपर्ने सजायसमेत सुनाएको थियो । ।
आशिकाले पुल शुल्कप्रति आपत्ति जनाउँदै २०८१ असोज ४ गते सामाजिक सञ्जालमार्फत विरोध गर्दै भिडियो सार्वजनिक गरेकी थिइन् । त्यसपछि उनले उक्त शुल्क असुलीप्रति आक्रोश व्यक्त गर्दै रसिद बुक समेत जलाएको आरोप लाग्यो । यिनै घटनाक्रमको आधारमा सूर्यविनायक नगरपालिकाले उनीविरुद्ध जाहेरी दिएको थियो ।
घटनापछि पक्राउ परेकी आशिकालाई जिल्ला अदालत भक्तपुरले २०८१ माघ १८ गते प्रारम्भिक सुनुवाइपछि २० हजार रुपैयाँ धरौटीमा रिहा गरेको थियो ।
यसअघि उनी काठमाडौं प्रहरी परिसरमा पनि अभद्र व्यवहारसम्बन्धी अभियोगमा थुनिएकी थिइन् । त्यहाँबाट १० हजार धरौटीमा छुटेपछि भक्तपुरमा मुद्दा अघि बढाइएको थियो ।
