काठमाडौँ, भदौ १२ । वीरगन्जमा हैजा संक्रमितको संख्या १ सय ४१ पुगेको छ । वीरगन्ज महानगरपालिकाको कार्यालयले आज विहान सार्वजनिक गरेको पछिल्लो तथ्यांक अनुसार महानगर क्षेत्रमा मात्रै हैजा संक्रमितको संख्या १ सय ३४ पुगेको हो । ती मध्ये ७६ जना विभिन्न अस्पतालमा उपचाररत छन् । कूल संक्रमित मध्ये ५८ जना डिस्चार्ज भइसकेका छन् ।
यस्तै, पोखरियामा ७ जनामा हैजा संक्रमण पुष्टी भएको छ । जिल्ला स्वास्थ्य संकट व्यवस्थापन समितिका प्रवक्ता सुमनचन्द्र ठाकुरका अनुसार, हालसम्म देखिएको हैजा आरडिटी परीक्षणबाट पुष्टी भएको हो । वीरगन्ज महानगर क्षेत्रमा खानेपानी संस्थानले वितरण गरेको पानी वा नयाँ जडान गरिएका डिप बोरिङबाट हैजाको संक्रमण फैलिएको अनुमान गरिएपनि हालसम्म आधिकारिक रुपमा हैजा संक्रमण फैल्याउने श्रोतको पुष्टी हुन सकेको छैन ।
यसैबीच, मधेश प्रदेश स्वास्थ्य निर्देशनालयका निर्देशक सरोज न्यौपानेले वीरगन्जमा फैलिएको हैजा नियन्त्रणमा आउने क्रममा रहेको जानकारी दिए । यता स्वास्थ्य मन्त्रालयका प्रवक्ता डा. प्रकाश बुढाथोकीले संघीय सरकार, प्रदेश तथा स्थानीय सरकार र विश्व स्वास्थ्य सङ्गठनको टोलीको सक्रियतामा हैजा नियन्त्रणउन्मुख रहेको बताएका छन्। वर्षाका बेला वर्षेनी कतिपय स्थानमा हैजाले प्रकोपको रुप लिने गरेको छ ।
