‘कृष–४’ लाई अभिनेता ऋतिक रोशनले नै निर्देशन गर्ने

मुम्बई, भदौ ११ । कोरियोग्राफर तथा फिल्ममेकर फराह खान आफ्नो भ्लग सिरिजका क्रममा निर्माता तथा अभिनेता राकेश रोशनको घर पुगेकी छिन् । सो क्रममा उनले राकेशसँग उनको निर्देशन यात्राबारे विस्तृत कुराकानी गरेकी छिन् ।

भ्लगकै दौरानमा राकेशले सुपरहिट फिल्म ‘कृष’ मा प्रयोग भएको वैक्स मास्कबारे अज्ञात रहस्य सार्वजनिक गरेका छन् । उनका अनुसार उक्त मास्क तयार पार्न झन्डै ६ महिना लागेको कुरा सेयर गरेका छन्। ‘मास्कको डिजाइनमा यति धेरै हेरचाह गरिएको थियो जसका लागि सेटमा ऋतिक रोशनभन्दा बढी मास्ककै हेरचाह गरिन्थ्यो, उनले हाँस्दै बताए ।

राकेशले ऋतिकको अनुहारसँग मिल्ने मास्क बनाउन टिमले लामो समय खर्च गरेको र पात्रको पहिरहन देखि अन्य सूक्ष्म विवरणसम्ममा विशेष ध्यान दिइएको बताएका छन्। उनले थप भने, ‘सबैभन्दा चुनौतीपूर्ण कुरा भनेको मास्क मौरीको मैनबाट बनेको थियो, जसले गर्दा गर्मीमा पग्लने खतरा थियो । त्यसैले सुटिङ सेटमै २४ घण्टा एसी बस राखिएको थियो ।’

यससँगै उनले आगामी ‘कृष–४’ बारे पनि जानकारी दिएका छन् । उनका अनुसार यो फिल्ममा अभिनेता ऋतिक रोशनले मुख्य पात्रका रूपमा मात्र नभई निर्देशकको भूमिकासमेत निर्वाह गर्नेछन् । यशराज फिल्म्स र रोशनको आफ्नै ब्यानरमा तयार हुन लागेको यस फिल्मको निर्माण कार्य सन् २०२६ को सुरुवातमा प्रारम्भ गर्ने योजना रहेको उनले बताएका छन् ।