काठमाडौं, फागुन ४ । वाणिज्य, आपूर्ति तथा उपभोक्ता संरक्षण विभागले रु ८२ लाख मूल्य बराबरको म्याद नाघेको बियर बरामद गरेको छ ।विभागले मंगलबार र बुधबार गरेको बजार अनुगमनका क्रममा म्याद नाघेका करिब २ हजार ७ सय ५७ डिब्बा बियर बरामद गरेको हो ।
विभागका महानिर्देशक महेश भट्टराईले बजार अनुगमनका क्रममा बाह्रसिङ्गे, टुबोर्ग, मुस्ताङ, नेपाल आइस, कार्ल्सबर्ग, गोरखालगायतका विभिन्न ब्राण्डका बियर बरामद गरिएको बताए ।
विभागले मंगलबार धुम्बाराहीस्थित याक ब्रुइङ कम्पनीको डिलर क्लाइम्याक्स ट्रेडिङ कम्पनीको तीन गोडाउनमा राखिएको २ हजार १ सय थान बियर बरामद गरेको छ ।
त्यसैगरी बुधबार संस्कार ट्रेडर्स प्रालि, सिनामंगलको गोडाउनबाट ३ सय ५५ थान म्याद नाघेको बियर र सिनामंगलस्थित सीके ट्रेडिङ प्रालिको गोडाउनबाट ३०२ कार्टन बियर बरामद गरिएको छ ।
विभागले कम गुणस्तरको तथा म्याद नाघेका बियर तथा अन्य पेय पदार्थको बिक्री वितरणमा सचेत रहन उपभोक्तालाई आग्रह गरेको छ भने उपभोक्तालाई पाइएमा विभागलाई जानकारी गराउन समेत विभागले जारी गरेको विज्ञप्तिमा उल्लेख छ ।
