‘सुख–दुःख’ मा अभिनेत्री विपना थापा अनुवन्धित

काठमाडौं, साउन २२ । अभिनेत्री तथा निर्मात्री नीता ढुङ्गाना अधिकारीको निर्देशनमा बन्न लागेको फिल्म ‘सुख–दुःख’ मा अभिनेत्री विपना थापा अनुवन्धित भएकी छिन् । यसअघि नीता र विपनाले फिल्म ‘ह्रस्व–दीर्घ’ मा सहकार्य गरेका थिए । यो उनीहरुको दोस्रो सहकार्य हो ।

बुधवार फिल्म ‘सुख–दुःख’ मा औपचारिक रुपमा अनुवन्ध भएपछि अभिनेत्री थापाले आफूलाई एकदम खुशी लागेको प्रतिक्रिया दिएकी छिन् । उनले फिल्मको कथाले नै आफ्नो मन छोएको र नीताको निर्देशनमा बन्न लागेको फिल्ममा काम गर्न पाउँदा असाध्यै उत्साहित भएको बताईन् ।

नीताले पनि आफ्नो फिल्ममा विपनालाई अनुवन्ध गर्न पाउँदा असाध्यै खुशी भएको बताईन् । उनका अनुसार यो फिल्ममा विपनाको महत्वपूर्ण भुमिका रहेको छ ।

नीताले यसअघि यो फिल्मका लागि कलाकारका रुपमा मिथिला शर्मा तथा मदनकृष्ण श्रेष्ठलाई अनुवन्ध गरिसकेकी छिन् ।

आगामी फागुनदेखि फ्लोरमा जाने यो फिल्मलाई भारतीय छायांकार कवीरलाल तथा शाहिदलालले छायांकन गर्दैछन् । नीता फिल्म्सको ब्यानरमा बन्न लागेको यो फिल्म आगामी वर्ष दशैँको फूलपातीका दिनदेखि प्रदर्शनमा आउने छ । यो फिल्मको वितरण अधिकार उपत्यकाबाहिर एफडी कम्पनीले लिएको छ भने उपत्यकाभित्र रिच इन्टरटेनमेन्टले पाएको छ ।