काठमाडौं, साउन १४ । प्रायः हामी सबैलाई बिहानको चिया बिस्कुट बिना अधूरो लाग्छ । तर स्वास्थ्य विशेषज्ञहरू भन्छन्– ‘यदि तपाईं पनि हरेक बिहान चियाको चुस्कीसँग बिस्कुटको स्वाद लिइरहनु भएको छ भने अब त्यो बानी छोड्ने बेला आएको छ ।’
बिस्कुट स्वादिलो र सस्तो मात्र होइन, सजिलै पाइन्छ । त्यसैले बच्चादेखि वृद्धसम्म, सबै उमेर समूहका मानिसहरू यसलाई मन पराउँछन् । तर यही बिस्कुट समयसँगै तपाईंको स्वास्थ्यका लागि ‘मीठो विष’ बन्न सक्छ ।
पाचन प्रणालीमा प्रभाव
विशेषज्ञहरूका अनुसार, बिस्कुटमा प्रयोग गरिने मैदा, रिफाइन्ड चिनी तथा हाइड्रोजनेटेड तेल शरीरका लागि हानिकारक हुन्छन् । यी तत्वहरू सजिलै नपच्ने भएकाले यसले पाचन प्रणालीमा गडबडी ल्याउँछ । जसका कारण ग्यास, कब्जियत र एसिडिटी जस्ता समस्या निम्तिन सक्छन् ।
ब्लड सुगर बढाउने खतरा
विशेष गरी डायबेटिज ९मधुमेह० रोगीहरूका लागि बिस्कुट निकै हानिकारक मानिन्छ । बिस्कुटको ग्लाइसेमिक इन्डेक्स उच्च हुने भएकाले यसले रक्तमा चिनीको मात्रा छिटो बढाउँछ, जुन दीर्घकालीन रूपमा ज्यानसमेत लिने खालको जोखिम हुन सक्छ ।
बालबालिकाको विकासमा असर
बालबालिकालाई बिस्कुट नियमित रूपमा खुवाउने बानीले उनीहरूको शारीरिक विकासमा नकारात्मक प्रभाव पार्न सक्छ । स्वास्थ्य विशेषज्ञहरूका अनुसार, बिस्कुटमा प्रोटिन, फाइबर र आवश्यक भिटामिनहरू अत्यन्त कम मात्रामा पाइन्छ । बिस्कुटको नियमित सेवनले उनीहरूको प्रतिरोधात्मक क्षमता पनि कमजोर हुनसक्छ।
मोटोपनको मुख्य कारक
डायटिसियनहरू भन्छन्— ‘बिस्कुटमा लुकेको क्यालोरी र चिनी शरीरमा फ्याटको रूपमा जम्न थाल्छ । यसले तौल वृद्धिको खतरा बढाउँछ र मोटोपन निम्त्याउँछ । विशेषगरी पहिलादेखि नै मोटोपनको समस्यामा रहेका व्यक्तिहरूले बिस्कुट सेवन तुरुन्तै बन्द गर्नु पर्ने विज्ञहरूको सुझाव छ । अन्य व्यक्तिहरूले पनि बिस्कुट अत्यधिक मात्रामा सेवन नगर्नु नै उपयुक्त हुन्छ ।’
