काठमाडौं, साउन ११ । साताको पहिलो कारोबार दिन आइतबार सेयर बजार परिसूचक नेप्से १८.४४ अंकले घटेर २९६४.२० बिन्दुमा अडिएको छ।
तीन हजार बिन्दुभन्दा माथि उक्लिएको नेप्से अन्तिममा ०.६१ प्रतिशतले घटेको छ। आज दिनभर ५ करोड ८६ लाख ५३ हजार ७ सय ६२ कित्ता शेयर २६ अर्ब ५७ करोड ७४ लाख ३८ हजार २ सय ३७ रुपैयाँमा किनबेच भएको छ।
आज कारोबारमा आएका कम्पनीमध्ये ६३ वटाको सेयर मूल्य बढेको छ भने १८६ वटाको घटेको छ।
करिब एक वर्षपछि बजारले ३ हजारको विन्दु पार गरे पनि अन्तमा घटेर बन्द भएको हो।
प्रि-ओपनिङमा २ अंकले बढेर २ हजार ९८४ बिन्दुबाट खुलेको बजारले दिउँसो १२ बजेर ५० मिनेट जाँदा ३ हजारको विन्दु पार गरेर ३ हजार १३ अंकमा पुगेको थियो । त्यसपछि भने बजार ओरालो लाग्दै अन्तमा घटेको छ।
आज समता घरेलु लघुवित्त र ट्रेड टावरका शेयरधनीले १० प्रतिशतले कमाएका छन् भने नारायणी डेभलपमेन्ट बैंकका शेयरधनीले ६.४ प्रतिशतले गुमाएका छन् ।
कारोबार रकमका हिसाबले शिवम् सिमेन्टको सबैभन्दा बढी शेयर कारोबार भएको छ।
