काठमाडौँ, साउन ७ । गत असार २४ को भीषण बाढीपहिरोले बगाएको नेपाल–चीन सिमानास्थित रसुवागढीको मितेरी पुललगायतका संरचनाको निर्माण सुरु भएको छ । रसुवागढीस्थित ल्हेन्देखोलामा बेलिब्रिज निर्माणको काम सुरु भइसकेको सडक विभागले जनाएको छ ।
विभागका प्रवक्ता प्रभातकुमार झाले नेपाल–चीन सीमास्थित मैत्री पुल रहेको ठाउँमा बेलिब्रिज तथा बाढीपहिरोबाट बगेका सडकलगायतका संरचनाको निर्माण कार्य सुरु भइसकेको जानकारी दिए । उनका अनुसार चीन सरकारले सो निर्माण सुरु गरेको हो ।
रसुवाको भोटेकोशी नदीमा आएको बाढीले मितेरी पुल र स्याफ्रुबेँसी–रसुवागढी सडकखण्ड बगाएपछि चीनसँगको सो व्यापारिक नाका ठप्प भएको थियो । बाढीपहिरोले स्याफ्रुबेँसीदेखि रसुवागढीसम्म विभिन्न स्थानमा गरेर करिब एक किलोमिटर सडक बगाएको थियो, जस कारण स्याफ्रुबेँसीदेखि रसुवागढीसम्मको आवतजावत ठप्प भएको थियो । त्यसै गरी सोही दिनको बाढीपहिरोले रसुवागढीबाट केरुङतर्फ जाने २५ किलोमिटर सडकमा समेत क्षति पुर्याएको थियो ।
यसअघि सरकारले रसुवागढीमा बाढीपहिरोले बगेका पुललगायतका संरचना निर्माण गरी यथाशक्य सो नाका सञ्चालनका लागि चीनलाई आग्रह गरेको थियो । साउन १ गते सिंहदरबारस्थित भौतिक पूर्वाधार तथा यातायात मन्त्रालयमा मन्त्री देवेन्द्र दाहाल र नेपालका लागि चीनका राजदूत चेन सोङबिच भएको भेटमा मन्त्री दाहालले राजदूत चेनसँग सो आग्रह गरेका थिए । राजदूत चेनले दसैँअघि नै मितेरी पुल भएको ठाउँमा बेलिब्रिज जडान गरी सञ्चालनमा ल्याउने प्रतिबद्धता व्यक्त गरेका थिए।
भदौ ३० गतेसम्म निर्माण सम्पन्न
रसुवाका प्रमुख जिल्ला अधिकारी अर्जुन पौडेलले बाढीपहिरोबाट बगेको मितेरी पुलको ठाउँमा बेलिब्रिजलगायतका संरचनाको निर्माण भदौ ३० गतेसम्म सम्पन्न गरिसक्ने जानकारी चिनियाँ पक्षले गराएको बताए । उनका अनुसार प्रतिबद्धताबमोजिम चीनले तीव्र गतिमा काम गरिरहेको छ । प्रमुख जिल्ला अधिकारी पौडेलले अहिले स्याफ्रुबेँसी–रसुवागढी सडकमा सवारीसाधन सञ्चालनमा आइसकेको जानकारी दिए । उनका अनुसार सो सडकमा बसलगायतका हलुका सवारीसाधन सञ्चालनमा आएका छन् । मालवाहक ट्रकलगायतका ‘हेभी’ सवारीसाधन सञ्चालनमा तत्कालका लागि रोक लगाइएको छ । यसअघि स्याफ्रुबेँसीदेखि रसुवागढीसम्म १६ किलोमिटरमा आवतजावत बन्द भएको थियो ।
सडक सुपरिवेक्षण तथा अनुगमन कार्यालयका प्रमुख शुभराज न्यौपानेले सडकको अवस्थाबारे विस्तृत अध्ययन गरेर मात्र स्याफ्रुबेँसीदेखि रसुवागढीसम्म मालवाहक ट्रकलगायतका ‘हेभी’ सवारीसाधन सञ्चालनमा ल्याउन सकिने बताए। चीन सरकारले मितेरी पुलमा बेलिब्रिज निर्माण गरुन्जेल नेपालतर्फका सडक संरचना पूर्ण रूपमा मर्मत भइसक्ने उनको भनाइ छ ।
