काठमाडौं, जेठ २६ । राज बहादुर सानेको निर्देशनमा निर्माण भएको नयाँ नेपाली फिल्म ‘सिटामोल’ का तीन नयाँ पोस्टर सार्वजनिक भएका छन् ।
सोमवार सार्वजनिक भएका तीन पोस्टरहरुमध्ये पहिलो पोस्टरमा सौगात मल्ल, बेनिशा हमाल तथा बाल कलाकार करण नेपाली भावुक देखिएका छन् ।
दोस्रो पोस्टरमा सौगात र बेनिशासहित श्री कृष्ण निरौला, जानुका विश्वकर्मा र लोकेन्द्र लेखक आ–आफ्नो पात्र अनुसारको भूमिकामा प्रस्तुत छन् । तेस्रो पोस्टरमा फिल्मका मुख्य कलाकार सौगात मल्ललाई मात्रै स्थान दिइएको छ । उनी वैशाखीको साहाराले निराश भावमा कतै हिडिरहेको बुझ्न सकिन्छ ।
सार्वजनिक पोस्टरले दर्शकमाझ यो फिल्मप्रति उत्सुकता थप्ने विश्वास निर्माण टिमको छ । आगामी साउन २३ गतेदेखि प्रदर्शनमा आउने यो फिल्ममा सौगात, बेनिशा, श्री कृष्ण, जानुका र करणसहित लोकेन्द्र लेखक, भुगोल कार्की, हिउँवाला गौतम, सुशील पोखरेल, दिनेश रेग्मी, आरआर खड्का, ज्ञानु मल्ल, पवन भट्टराई, काजल भुजेल र बालकलाकार आराध्या राज्यलक्ष्मी डिसीको अभिनय छ ।
‘सिटामोल’ मार्फत् निर्माता तथा निर्देशकले बिम्बात्मक नेपाल र आम नेपालीको जनजीवन र परापुर्वकालदेखि नेपाली समाजमा जरा गाड्दै आएको कुसंस्कारलाई चिरफार गर्न खोजेको छन् ।
फिल्मले त्यही समस्याको उठानसहित दर्शकको मन जित्ने उदेश्य लिएको भनाई निर्देशक तथा निर्माताको रहेको छ ।
तुल्सी देवी फिल्मले जुनतारा फिल्म्सको सहकार्यमा निर्माण भएको यो फिल्मको कथा प्रदीप भारद्धाज तथा निर्देशक सानेले लेखेका हुन् ।
Published Date: 09 June 2025
