काठमाडौं, फागुन २ । दक्षिण कोरियाली सरकारका एक उच्च अधिकारीले आगामी वर्ष थप नेपाली कामदारलाई दक्षिण कोरियामा स्वागत गर्ने घोषणा गरेका छन् ।
भ्रमणमा रहेका दक्षिण कोरियाका राष्ट्रपतिका विशेष दूत जाङ सुङ मिनले अहिले दक्षिण कोरियामा विभिन्न क्षेत्रमा करिब १५ हजार नेपाली कामदार कार्यरत रहेको बताए । ‘नेपाली कामदारको कडा परिश्रम र इमान्दारिताको कदर गर्दै आगामी वर्ष यो संख्या अझै बढ्ने अपेक्षा गरेका छौँ,’ उनले भने ।
सोमबार राजधानीमा आयोजित पत्रकार सम्मेलनलाई सम्बोधन गर्दै व्यापारिक नेता र अन्य वरिष्ठ सरकारी अधिकारीहरुसँगै आएका विशेष ईन्भी जाङले दक्षिण कोरियाले विभिन्न १६ देशका कामदारलाई श्रम स्वीकृति प्रदान गरेको बताए । उनले कडा परिश्रम र इमान्दारिताका कारण नेपाली कामदारलाई दक्षिण कोरियाली रोजगारदाताले रुचाउने गरेको बताए ।
आगामी वर्ष ईपीएस व्यवस्था अन्तर्गत दक्षिण कोरियामा नेपाली कामदारको संख्या २० हजार पुग्ने अपेक्षा गरिएको छ । “हाम्रो देश सबै श्रमिकहरूलाई मानवअधिकार सुनिश्चित गर्ने भएकाले सबैभन्दा मनपर्ने श्रम गन्तव्य बन्न पुगेको छ। हामीले विदेशी र घरेलु कामदारमा कुनै भेदभाव गर्दैनौं,’ उनले भने ।
दुई देशबीच कूटनीतिक सम्बन्ध स्थापना भएको ५०औँ वर्ष मनाइरहँदा दक्षिण कोरियाका राष्ट्रपति युन सुक येओलले विशेष दूत जाङलाई नेपाल पठाएका थिए । “अर्को वर्ष कोरिया र नेपालले कूटनीतिक सम्बन्ध स्थापना भएको ५०औँ वर्ष मनाउँदैछन् । ५० औँ वार्षिकोत्सव मनाउन र हाम्रो द्विपक्षीय सम्बन्धलाई अझ मजबुत बनाउन सकिने अवसरहरू हेर्न म यहाँ छु,’ उनले थपे ।
विशेष दूत जाङले करिब ७० वर्षअघि दक्षिण कोरिया सबैभन्दा गरिब राष्ट्र भएको र अन्तर्राष्ट्रिय मित्र र साझेदारहरूको सहयोगमा विश्वको १०औँ ठूलो अर्थतन्त्रमा परिणत हुन सक्ने बताए । “यो अरूलाई फिर्ता दिने हाम्रो समय हो। म यहाँ नेपाली साथीहरूसँग कसरी विकास सहायतालाई थप वृद्धि गर्न सकिन्छ भनेर छलफल गर्न आएको छु,’ उनले भने।
नेपाल र दक्षिण कोरियाबीच धेरै समानता रहेकाले दक्षिण कोरियाले ल्याएको विकास पाठले नेपालका लागि ठूलो सहयोग पुग्ने पनि जाङले बताए । उनले नेपालले अवलम्बन गरेको लोकतान्त्रिक मार्गले मुलुकको विकासमा सहयोग पुग्ने बताए ।
विशेष दूत जाङले दक्षिण कोरियाले नेपाललाई दिने विभिन्न विकास सहायताको पनि प्रकाश पारेका थिए । दक्षिण कोरियाले सकेसम्म धेरै नेपालीलाई रोजगारी र सीप उपलब्ध गराउन प्रतिबद्ध रहेको बताउँदै उनले सामसुङ कम्पनीले सामसुङ टिभी उत्पादन गर्न भैरहवामा एसेम्बली प्लान्ट स्थापना गरिसकेको पनि बताए । कम्पनीले मार्चको पहिलो साताबाट उत्पादन सुरु गर्ने अपेक्षा गरेको छ ।
