न्युयोर्क, वैशाख ७ । हजारौँ प्रदर्शनकारीले शनिबार न्यूयोर्क, वासिङ्टन र संयुक्त राज्य अमेरिकाका अन्य सहरमा डोनाल्ड ट्रम्प र उनको कडा नीतिहरु विरुद्ध प्रदर्शनको दोस्रो प्रमुख चरण आयोजना गरेका छन् ।
न्युयोर्कमा ‘अमेरिकामा कुनै राजा छैनन्’ र ‘अत्याचारको प्रतिरोध गर्नुहोस्’ जस्ता नारासहित अमेरिकी राष्ट्रपतिलाई लक्षित गर्ने संकेतहरु बोकेका मानिसहरु सहरको मुख्य पुस्तकालय बाहिर भेला भएका थिए ।
आप्रवासीहरुलाई पक्राउ गर्न आप्रवासन र भन्सार प्रवर्तन एजेन्सीको भूमिकाको सन्दर्भमा धेरैले “नो आइसिई, डर छैन, आप्रवासीहरुलाई यहाँ स्वागत छ’ भन्दै ट्रम्पको कागजातविहीन आप्रवासीहरुको निर्वासनलाई लक्षित गरेका थिए ।
वासिङ्टनमा प्रदर्शनकारीहरुले ट्रम्पले न्यायिक प्रक्रियाको अधिकार सहित लामो समयदेखि सम्मानित संवैधानिक मान्यताहरुलाई खतरामा पारेको भन्दै चिन्ता व्यक्त गरे ।
“प्रशासनले कानूनी शासनको विचार र संयुक्त राज्य अमेरिकामा बसोबास गर्ने मानिसहरुलाई दुर्व्यवहार गर्नबाट प्रतिबन्धित हुनुपर्ने विचारमाथि प्रत्यक्ष आक्रमण गरिरहेको छ”, ४१ वर्षीय बेन्जामिन डगलसले ह्वाइट हाउस बाहिर भने ।
केफियाह लगाएका र गत महिना पक्राउ परेका प्यालेस्टिनी समर्थक विद्यार्थी प्रदर्शनकारी महमुद खलिललाई मुक्त गर्न आह्वान गर्ने ब्यानर बोकेका डगलसले व्यक्तिहरुलाई ‘विदेशीप्रति घृणा फैलाउन र लामो समयदेखि स्थापित कानूनी संरक्षणहरु कमजोर पार्ने परीक्षण मामिलाहरु’ का रुपमा लक्षित गरिएको बताए ।
“हामी ठूलो खतरामा छौँ”, नाजी नेता एडोल्फ हिटलर कसरी सत्तामा आए भन्ने उनीहरुको कथाहरु ‘यहाँ भइरहेको छ’ भन्दै यहुदी नरसंहारबाट बाँचेकाहरुकी छोरी ७३ वर्षीया न्युयोर्क प्रदर्शनकारी क्याथी भालीले भने, “एउटा कुरा के हो भने ट्रम्प हिटलर वा अन्य फासिस्टहरुभन्दा धेरै मूर्ख छन् उनलाई प्रयोग गरिँदैछ र उनको आफ्नै टिम विभाजित छ ।” – एएफपी
