काठमाडौं, चैत २४ । अमेरिकाका राष्ट्रपति डोनाल्ड ट्रम्प र उनका अर्बपति सहयोगी इलन मस्कका नीति विरुद्ध अमेरिकाभर लाखौं मानिसहरु सडकमा उत्रिएर विरोध प्रदर्शन गरेका छन् । उनीहरुले ट्रम्प र मस्कको नीतिहरु अधिनायकवादी अतिक्रमण र अर्बपति समर्थित एजेन्डा भन्दै विरोध प्रदर्शन गरेको गार्डियनले लेखेको छ । आयोजकहरुले वासिङ्टन डीसी, फ्लोरिडा र अन्यत्र ५ लाख भन्दा बढी मानिसहरु विरोध प्रदर्शनमा उत्रिएको अनुमान गरेका छन् ।
वासिङ्टनको नेसनल मलमा, ट्रम्प विरोधी र्याली हुनुभन्दा पहिले न्यु ह्याम्पसायर र पेन्सिलभेनिया जस्ता टाढाका क्षेत्रहरुबाट प्रदर्शनकारीहरु वासिङ्टन स्मारकको परिसरमा भेला भएका थिए । प्रदर्शनकारीहरुले विभिन्न प्लेकार्डहरु र केतिपयले युक्रेनी झण्डा पनि प्रदर्शन गर्दै ट्रम्प प्रशासनको नीतिहरुको विरोध गरेका छन् ।
केही प्रदर्शनकारीहरुले ट्रम्पले पदभार ग्रहण गरेपछि वासिङ्टन डीसीमा भएको पहिलो सामूहिक प्रदर्शनले अरुलाई पनि विरोध गर्न प्रेरित गर्ने आशा व्यक्त गरेका छन् । प्रदर्शनको एक उद्देश्य मानिसमा जागरण ल्याउनु पनि रहेको प्रदर्शनकारीहरुले बताएका छन् ।
‘ह्यान्ड्स अफ’ नाम दिइएको उक्त विरोध प्रदर्शनको आयोजकमध्ये एक रहेका संस्था ‘मुभअन’ ले दर्जनौं श्रम, वातावरणीय र अन्य प्रगतिशील समूहहरुसँग मिलेर अमेरिकाभरि १ हजार भन्दा बढी विरोध प्रदर्शनहरु भएको बताएको छ । प्रर्दशनबाट ट्रम्पप्रति आज्ञाकारिता देखाइरहेका र घुँडा टेक्न इच्छुक रहेका सबै व्यक्ति र संस्थाहरुलाई एउटा ठूलो जनआन्दोलन उनीहरुलाई रोक्न इच्छुक छ भन्ने संकेत दिन खोजेको प्रदर्शन आयोजकमध्ये एक संस्थाले बताएको छ ।
