मुम्बई, चैत १३ । बलिउड सुपरस्टार आमिर खानले आफ्ना फ्यानहरुलाई खुसीको खबर दिएका छन् । विगत साढे तीन दशकदेखि फिल्म क्षेत्रमा सक्रिय रहेका आमिर खान अहिले युट्युबमा पनि आफ्नो उपस्थितिको अनुभूति दिइरहेका छन् ।
आमिरको आफ्नो व्यक्तिगत सामाजिक सञ्जाल एकाउन्ट नभए पनि उनको प्रोडक्सन हाउस ‘आमिर खान प्रोडक्सन’ सामाजिक सञ्जालमा सक्रिय रहन्छन् । यस मार्फत आमिर आफ्ना फ्यानहरूसँग जोडिन्छन् र आफ्ना फिल्महरूसँग सम्बन्धित जानकारीहरू साझा गर्छन् । अब आमिरले युट्युब च्यानल खोलेका छन् र यसको पछाडि एउटा विशेष उद्देश्य रहेको छ ।
यो खबर आमिर आफैले आफ्नो प्रोडक्सन हाउसको सोसल मिडिया अकाउन्टमा सेयर गरेका छन् । क्याप्सनमा लेखिएको थियो, ‘सिनेमा, कथा र अनफिल्टर गरिएका पलहरू । हामीले कथाहरू सिर्जना गरेका छौँ, जसले तपाईँलाई हसाउने, रुवाउने र तपाईँलाई सोच्न बाध्य तुल्याएको छ। अब हामी तपाईँलाई आमिर खान टकिज मार्फत फिल्मको नयाँ दुनियाँमा लैजान गइरहेका छौँ, जुन संसार तपाईले पहिले कहिल्यै भ्रमण गर्नुभएको छैन । यहाँ तपाईंले पर्दा पछाडिका भिडियोहरू र फिल्महरूको बारेमा कुराकानीहरूमा प्रत्यक्ष पहुँच पाउनु हुनेछ।’
Published Date: 27 March 2025
