काठमाडौं, फागुन १ । उपप्रधानमन्त्री तथा अर्थमन्त्री विष्णुप्रसाद पौडेलले चालु आर्थिक वर्षको बजेटमा राखिएको ८ प्रतिशतको आर्थिक वृद्धिको लक्ष्य पूरा हुन नसक्ने बताएका छन्।
आइतबार प्रतिनिधिसभामा चालु आर्थिक वर्षको बजेटको अर्धवार्षिक समीक्षा पेस गर्दै अर्थमन्त्री पौडेलले यस्तो बताएका हुन् ।
उनले पर्यटन क्षेत्रमा केही सुधार भए पनि उत्पादनमूलक उद्योग पूर्ण क्षमतामा चल्न नसकेको बताए । त्यसैले चालु आर्थिक वर्षमा ८ प्रतिशतको आर्थिक वृद्धिको लक्ष्य हासिल नहुने पौडेलले बताए । उनले वर्तमान र दीर्घकालीन दायित्वका कारण सरकारमाथि थप दबाब थपिएकाले सरकारको आर्थिक वृद्धिको लक्ष्य हासिल हुन नसक्ने बताए ।
पौडेलले आयात नियमनको प्रभाव र आपूर्तिमा आएको सुस्तताले राजस्व सङ्कलन न्यून हुँदा मुलुकको अर्थतन्त्र चरम दबाबमा रहेको बताए । अर्थमन्त्री पौडेलले राजस्व प्रणालीले अनिवार्य रुपमा विनियोजन गरेको रकम पनि अपुग रहेको बताए ।
अर्थमन्त्री पौडेलले विश्व अर्थतन्त्रमा देखिएको कडा नीतिले नेपालको आर्थिक नीतिमा चुनौती थपेको बताए । गत वर्षको तुलनामा धान उत्पादनमा थोरै मात्र वृद्धि भएको उनले बताए ।
बजेटमा ७ प्रतिशतको सीमाभित्र मूल्यवृद्धि गर्ने लक्ष्य राखे पनि ७ दशमलव २६ प्रतिशत पुगेको अर्थमन्त्री पौडेलले बताए ।
