काठमाडौं, फागुन १ । इंग्लिस प्रिमियर लिग फुटबलमा म्यानचेस्टर सिटीले एस्टन भिल्ला माथि सहज जित निकालेको छ ।
आइतबार राति भएको खेलमा सिटीले एस्टन भिल्लालाई ३-१ गोल अन्तरले हराउदै जित निकालेको हो । सिटीको जितमा खेलको चौंथो मिनेटमा रोड्रीले गोल गर्दै सिटीलाई सुरुआती अग्रता दिलाएका थिए ।
त्यसै खेलको ३९ औं मिनेटमा इल्के गुन्डोगानले गोल गर्दा सिटीको अग्रता २-० को बन्यो भने पहिलो हाफको इन्जुरी समयमा रियाद महरेजले पेनाल्टीबाट गोल गर्दै सिटी ३-० ले अघि रहेको थियो ।
दोस्रो हाफको खेलको ६१ औं मिनेटमा एस्टनका ओली वाट्किन्सले गोल गरेपनि सिटी ३-१ ले विजयी भयो ।
यस जितसँगै सिटीले २२ खेलमा ४८ अंक जोडेर दोस्रो स्थानमा उक्लिएको छ । त्यस्तै एस्टन २८ अंक जोडेर ११ औं स्थानमा रहेको छ ।
