काठमाडौं, माघ २९ । विवेकशील साझा पार्टीको अध्यक्षमा समिक्षा बाँस्कोटा निर्वाचित भएकी छिन् ।
काठमाडौंमा सम्पन्न पार्टीको पहिलो महाधिवेशनले उनलाई पार्टीको नयाँ अध्यक्षमा चयन गरेको हो । त्यस्तै पार्टीको उपाध्यक्षमा प्रकाशचन्द्र परियार, मिलन पाण्डे र विमला अधिकारी नियुक्त भएका छन् ।
महाधिवेशनले रञ्जु दर्शनालाई महासचिवमा चयन गरेको पार्टीले जनाएको छ । पाण्डे र दर्शना लामो समयपछि पार्टीमा सक्रिय भूमिकामा फर्किए । पार्टीभित्र आन्तरिक मतभेद देखिएपछि उनीहरु पार्टीमा सक्रिय छैनन् ।
पार्टीको सचिवमा पवित्र थापा, समुद्र केसी र विमला केसी निर्वाचित भएका छन् भने कोषाध्यक्षको जिम्मेवारी दामोदर नेपालले पाएका छन् । सबै पदाधिकारी सर्वसम्मतिले निर्वाचित भए पनि केही व्यक्तिले पदका लागि दाबी गरेकाले पार्टी केन्द्रीय सदस्य छनोटका लागि निर्वाचनको तयारीमा रहेको उपाध्यक्ष परियारले जानकारी दिए ।
