काठमाडौं, माघ २८ । काठमाडौंको चोभार सुख्खा बन्दरगाहको आन्तरिक टर्मिनल छिट्टै सञ्चालनमा आउने भएको छ ।
नेपाल इन्टरमोडल यातायात विकास समिति अन्तर्गत सुक्खा बन्दरगाह भित्रको टर्मिनल गत चैत मसान्तमा सञ्चालनमा आएको थियो । तर आन्तरिक टर्मिनल भने सञ्चालनमा आउन सकेको छैन ।
समितिका कार्यकारी निर्देशक आशिष गजुरेलले सम्बन्धित निकायसँग आवश्यक पत्राचार गरेर एक–दुई दिनभित्र आन्तरिक टर्मिनल सञ्चालनमा ल्याउने जानकारी दिए ।
सुख्खा बन्दरगाहको आन्तरिक टर्मिनलमा १५० ट्रक, गोदाम, मापन स्केल र लोडिङ र अनलोडिङ शेड पार्किङ गर्ने क्षमता छ । व्यापार सहज बनाउने उद्देश्यले टर्मिनलको प्रयोगमा प्रवेश शुल्क नि:शुल्क हुनेछ भने सवारी साधन पार्किङ, सामान लोडिङ/अनलोडिङलगायतका सुविधा न्यूनतम शुल्कमा उपलब्ध हुने गजुरेलले बताए ।
यसैबीच नेपाल इन्टरमोडल यातायात विकास समितिले सामान आयातकर्ता तथा निर्यातकर्तालाई चोभार सुख्खा बन्दरगाह प्रयोग गरी काठमाडौंको बाहिरी भागमा रहेको बन्दरगाहमा उपलब्ध सेवाबाट लाभ लिन आग्रह गरेको छ ।
करिब २६० रोपनी क्षेत्रफलमा फैलिएको सुख्खा बन्दरगाहमा भन्सार, क्वारेन्टाइन, बैंकलगायतका सेवा समेटिएका छन् । बन्दरगाहमा तीनवटा लोड-अनलोड भवन, तीन वटा गोदाम, तीन वटा प्रशासनिक भवन, तीन वटा तौल मापन शेड, कन्टेनर यार्ड, पावर सबस्टेसन, बाउन्ड्री बत्ती र अन्य सवारीसाधन पार्किङ सुविधा रहेका छन् । बन्दरगाहको कन्टेनर यार्डमा ६५,००० वर्ग मिटर पार्किङ क्षेत्र छ जसमा ५०० कन्टेनर र ५०० ट्रकहरू समायोजन गर्न सकिन्छ।
