लस एन्जलस, माघ ३ । नासाका वैज्ञानिकहरुको नेतृत्वमा गरिएको विश्लेषणले सन् २०२४ मा पृथ्वीको सतहको औसत तापक्रम रेकर्ड अहिलेसम्मकै उच्च (तातो) रहेको पुष्टि गरेको छ । सन् २०२४ मा विश्वव्यापी तापमान २० औं शताब्दीको आधारभूत रेखा (सन् १९५१–१९८०) भन्दा १.२८ डिग्री सेल्सियस बढी रहेको थियो ।
नासाका प्रशासक बिल नेल्सनले भने,“फेरि पनि तापक्रमको रेकर्ड तोडिएको छ । सन् १८८० मा रेकर्ड राख्ने काम सुरु भएदेखि सन् २०२४ सबैभन्दा तातो वर्ष रहेको देखिएको छ ।”वैज्ञानिकहरुले हालैका दशकहरुमा तापक्रम वृद्धिको लागि कार्बन डाइअक्साइड, मिथेन र अन्य हरितगृह ग्यासहरुलाई दोष दिन्छन् ।
हालैको अन्तर्राष्ट्रिय विश्लेषणका अनुसार सन् २०२२ र सन् २०२३ मा पृथ्वीले जीवाश्म इन्धनबाट कार्बन डाइअक्साइड उत्सर्जनमा कीर्तिमानी वृद्धि गरेको देख्न सकिन्छ ।वायुमण्डलमा कार्बन डाइअक्साइडको एकाग्रता बढेर अहिले लगभग ४२० भाग प्रतिमिलियनमा पुगेको छ । – सिन्हवा