काठमाडौँ, माघ २६ । राष्ट्रिय स्वतन्त्र पार्टीका अध्यक्ष रवि लामिछानेले राहदानी विभागमा बुझाएको राहदानीबारे जिल्ला सरकारी वकिल कार्यालय काठमाडौंले छानबिन सुरु गरेको छ । लामिछानेले अवैध नागरिकताको प्रमाणपत्र प्रयोग गरी नेपाली राहदानी दुरुपयोग गरेको उजुरीमाथि कार्यालयले अनुसन्धान सुरु गरेको हो।
लामिछानेविरुद्ध फागुन ७ गते मंगलबार परेको उजुरीमाथि सरकारी वकिलको कार्यालयले छानबिन गर्न लागेको हो ।
युवराज पौडेल (सफल)ले लामिछानेविरुद्ध राहदानी दुरुपयोग गरेको उजुरी दिएका छन् । लामिछानेको नागरिकता विवादमा पौडेलले यसअघि सर्वोच्च अदालतमा रिट दायर गरेका थिए । जिल्ला प्रहरी परिसर काठमाडौंले लामिछानेविरुद्ध उजुरी दर्ता गर्न अस्वीकार गरेपछि पौडेलले जिल्ला सरकारी वकिलको कार्यालय काठमाडौंमा उजुरी दिएका थिए ।
पौडेलले दिएको बयानका आधारमा जिल्ला सरकारी वकिलको कार्यालयले माथि उल्लेखित निकायबाट कागजात र थप विवरण मागेको हो ।
लामिछानेको नागरिकता विवादमा परेको रिटमा सुनुवाइ गर्दै सर्वोच्च अदालतले लामिछानेले अमेरिकी नागरिकता त्यागेपछि नेपाली नागरिकता प्राप्त गर्ने प्रक्रिया सुरु नगरेको र लामिछानेसँग नेपाली नागरिकता नभएको ठहर गरेको छ ।
सर्वोच्चको फैसलापछि लामिछानेले पार्टी अध्यक्ष, सांसद, उपप्रधानमन्त्री र गृहमन्त्री पद गुमाएका थिए ।
