काठमाडौं, मंसिर १० । सरकारले सुन र चाँदीमा लाग्ने भन्सार महसुल दर घटाएको छ । जसमा सुनमा भन्सार महसुल दर २० प्रतिशतबाट घटाएर १० प्रतिशतमा झारेको छ ।
यस्तै, चाँदीमा लाग्ने भन्सार महसुल दर १५ प्रतिशतबाट घटाएर १० प्रतिशत बनाइएको छ । मंसिर ६ गते मन्त्रिपरिषद्को बैठकले महसुल दर घटाउने निर्णय गरेको हो।
यसअघि गत जेठ १५ गते तत्कालीन अर्थमन्त्री वर्षमान पुनले आर्थिक ऐन मार्फत सुनको भन्सारदर २० प्रतिशत पुर्याएका थिए । सो लगत्तै नेपाली बजारमा सुनको भाउ महँगो हुन पुगेको थियो ।
भन्सार महसुल दर घटेसँगै सुनको भाउ आज एकैदिन तोलामा करिब १६ हजार रुपैयाँले घटेको छ । नेपाल सुन–चाँदी व्यवसायी महासंघका अनुसार सोमबार छापावाल सुन प्रतितोला १५ हजार ९०० रुपैयाँले घटेर १ लाख ५१ हजार ३०० रुपैयाँमा झरेको छ ।
यसअघि, आइतबार छापावाल सुनको भाउ १ लाख ६७ हजार २०० रुपैयाँ कायम रहेको थियो ।
यता, सोमबार चाँदीको भाउ पनि तोलामा ११५ रुपैयाँले घटेर १८ सय ४५ रुपैयाँमा झरेको छ । आइतबार चाँदीको भाउ तोलाको १९ सय ६० रुपैयाँ रहेको थियो ।
